UMncwango uthembisa lukhulu KwaNongoma
IMEYA entsha eMkhandlwini waKwaNongoma, uMnuz Albert Mncwango ithi ukuhlinzeka umphakathi ngamanzi iyona into eseqhulwini ezinhlelweni zayo njengoba izindawo eziseNyakatho nesifundazwe iKwaZulu-Natal zibhekene nesomiso.
“Khumbula, ngizalelwe ngakhulela lapha KwaNongoma, amanzi iyona into eseqhulwini lapha ukwedlula ugesi nemigwaqo,” kusho uMncwango. Ezinhlelweni zika-2012/13 kuya ku-2016/17, amanzi abelokhu eseqhulwini KwaNongoma.
“Amanzi ayimpilo, ngaphandle kwamanzi ahambayo ahlanzekile umphakathi ubhekene nengozi yokuthi ugule.” Ucwaningo olukhishwe yi-Urban Econ ngo2009, luveza ukuthi ngu-2.64% wemizi KwaNongoma enamanzi ahambayo asemapayipini, kuthi u-49.27% usebenzisa amanzi owakha emfuleni.
Umbiko uveze ukuthi uNongoma unenkinga yokuthuthwa kwendle.
“Sizosebenzisana nezinye izinhlaka emphakathini ukuze sikwazi ukushintsha impilo yabantu,” kusho uMncwango.
UMncwango obeyilungu lePhalamende iminyaka engu-23, ungene endaweni kaMfundisi Sthembiso Mataba owesulile. UMataba ubeyiMeya ngemuva kokhetho lohulumeni bezindawo nyakenye.
Yize kungacaci ukuthi kungani uMataba esulile, uMncwngo ugcotshwe ngoLwesine emhlanganweni womkhandlu. Uthe ukusebenza ePhalamende kumnike amava azowasebenzisa KwaNongoma.
UMncwango osebenze emikhakheni eyahlukene ePhalamende nasemakomitini ehlukene esikhashana uthe isikhathi asijabulele kakhulu yilapho bekuphethe khona uMnuz Thabo Mbeki phakathi kuka-1999 no-2008.