‘Amabhasi azodla umsebenzi wethu’
BATHI uzodliwa befile umsebenzi wabo osomatekisi bososesheni iClermont/ KwaDabeka nePinetown emuva kokuvela kwezindaba zokuthi amabhasi e-GO! Durban azoqala ukusebenza maduze.
Emhlanganweni obungoLwesine eKK Hall, KwaDabeka, uSihlalo kasosesheni iClermont/KwaDabeka, uMnuz Mandla Mchunu, ufanise amabhasi e-GO! Durban nenyoka ezodla isinkwa sabo.
“Sibhekene nenyoka esingayazi noma inomsila noma ayinawo yini kodwa izodla umsebenzi wethu. Sibona emaphephandabeni kuthiwa amabhasi azoqala ukusebenza maduze kodwa thina esithinteka ngqo ngalolu hlelo lweGO! Durban asitsheliwe.
“Selokhu kwaqala uhlelo lokumbiwa kwemigwaqo yithina ebesiphazamiseka kakhulu. Kubuhlungu ukubona emaphephandabeni ukuthi sezizoqala izinhlelo zamabhasi ngaphandle kolwazi lwethu,”kusho uMchunu.
USihlalo kasosesheni wasePinetown, uMnuz Bheki Mbambo, obuye abe yiPhini likaSihlalo weSantaco KwaZuluNatal, uthe bahlangene bengosomatekisi basePinetown nabaseClermont/KwaDabeka ngoba lolu hlelo luzophazamisa umsebenzi wabo.
Uthe akusikho ukuthi beza nempi kuMasipala weTheku kodwa okubasukumisile wukuthi amabhasi amasha azobathathela isinkwa sabo futhi abatshelwanga ukuthi bazothinteka kanjani.
Uveze ukuthi ngesikhathi kuqala uhlelo umasipala wayefuna ukuzenzela noma yini emhlabeni wakhe kodwa bacela ukuthi baxoxe naye beyimboni.
“Kwenziwa isivumelwano sokuthi sizoxoxa kodwa phezu kwaso isivumelwano uMasipala weTheku uqhubekile wamba imigwaqo.
“Into okuyiyona esemqoka ngaphezu kwazo zonke izinto yinduku esikhokhobelayo edinga amandla amadoda, awabantu besifazane nawezingane zethu ngoba uma kuthiwa sidedela amabhasi ukuthi asebenze manje kuyobe sibulala ikusasa lethu.
“Ucwaningo alwenziwanga, akukho ukuthi umzila wenza malini, akukho ukuthi umuntu onxeshezelwayo uzothola malini okusho ukuthi umasipala uzozenzela noma yini,” kusho uMbambo.
Uthe bafuna uMasipala weTheku abachazele ukuthi kwenzekani zingakapheli izinsuku eziyisikhombisa.
Amanye amalungu athe uma uMasipala weTheku engachazi into ezwakalayo bazomisa yonke into ngoba bakhathele wukudlelwa umsebenzi nokubukelwa phansi nguhulumeni.
Ababhekelele ezokuxhumana kuMasipala weTheku bathe izingxoxo nosomatekisi ngohlelo lwe-GO! Durban zigcine ngoFebhuwari 17.Babekhona bonke ososesheni abawu-20 abasebenzela e-Durban West.
Baveze ukuthi osomatekisi banomeluleki owaqokwa ngoOkthoba 2014 ukuze kuthi uma kudingidwa izindaba zohlelo olusha lwezokuthutha babe nolwazi abaludingayo.
Bathe alukho usuku olubekiwe lokuthi amabhasi e-GO! Durban azoqala nini ukusebenza ngoba kusazoba nezingxoxo nosomatekisi abathintekayo.
Amabhasi e-GO! Durban azosuka eBridge City ayophelela enkabeni yePinetown azodlula KwaMashu, Clermont, KwaDabeka nase-New Germany kanti lo mzila ubizwa ngo-C3 ezinhlelweni zohlelo olusha lwezokuthutha lukaMasipala weTheku.
Kuzoba nohlelo lokuthi amatekisi eze nabantu abazogibela amabhasi kodwa nalokhu kusaxoxwa nezinhlaka ezithintekayo.
Abophiko lwezokuxhumana bathe akusilo iqiniso ukuthi i-GO! Durban ithinta i-Pinetown nezindawo eziyakhele kuphela ngoba uhlelo luzosebenza eThekwini namaphethelo futhi luzoqinisekisa ukuthi abantu bahamba ngezokuthutha eziphephile, ezingambi eqolo futhi luthuthukisa nomnotho ngokwehlisa isiminyaminya emgwaqweni.