Izihlobo zikhale zaze zaquleka
KUSIZE abezimo eziphuthumayo emngcwabeni wabayisishiyagalombili baseZinqoleni abashona engozini yeveni neloli ngesikhathi abebehambele umngcwabo bekhala beze bequleka.
Oyedwa wabaqulekile ugcine ethathwe nge-ambulensi eyonikwa olunye usizo lwezempilo. Abanye bebesizwa lapho ebekunenkonzo yomngcwabo khona.
Lokhu kwenzeke iqhubeka inkonzo yomngcwabo etendeni ebeligcwele lithe phama, abanye abantu behleli emnyango.
Emngcwabeni woMnuz Siyanda Xolo (24), Mbuso Blose (23), Buhle Mthembu (23), Siyabonga Hlongwane (37), Mlondolozi Blose (23), Menzi Mthembu (26), Nkz Nokwanda Ncama (18) noPhumelele Bulose (24), izihlobo zabo zikhale kakhulu ngokufa kwabo besebancane ngoba bezisalindele lukhulu kubona.
UMnuz Doctor Blose, uyisemkhulu kaMbuso, Mlondolozi noPhumelele uthe umndeni ufe olwembiza.
“Silahlekelwe abantu ebesibheke ukuthi kube yibona abazosingcwaba emndenini ngoba besebasha, izingane lezi ebesibheke lukhulu kuzona.
“Bashone njengokuzwana kwabo njengoba bebeyizingane ezingomakhelwane ezingahlukani, nasekufeni abahlukananga,” kusho uBlose.
UNgqongqoshe wezokuThutha KwaZulu-Natal, uMnuz Mxolisi Kaunda, uthe ayikaziwa imbangela yengozi ngoba uphenyo lusaqhubeka.
“Uma sekuphothuliwe konke ngophenyo sizokwazi ukuthi yini edale ingozi, okusemqoka ukuba ingozi efana nalena ingaphinde yenzeke.
“Sonke esisebenzisa umgwaqo ikakhulukazi abantu abasha kumele siqikelele ukuze siqede izingozi,” kusho uKaunda.
UNgqongqoshe uphinde waxwayisa abantu abasha ukuthi babhekisise emgwaqweni ngoba yibona abashona kakhulu.
“Kuhlale kushiwo ngisho kukhishwa izibalo ukuthi izingozi zomgwaqo zibhubhisa kakhulu intsha yakithi ngezizathu ezahlukene. Kokunye kuyavela ukuthi intsha yakithi iyabuthanda ubumnandi bese izijabulisa kuze kweqe kanti isazosebenzisa umgwaqo, “,kusho uKaunda.
Izingozi ezenzeka kulomgwaqo ongu N2 kusukela eMgababa uze uyofika eHarding zihlasimulisa umzimba.
Ngokwezibalo zoMnyango wezokuThutha kusukela ngoEphreli nyakenye kuze kube yimanje bangaphezulu kuka 80 abantu asebedlule emhlabeni ezingozini zomgwaqo kule ndawo.