Useboshiwe osolwa kwelaseGlebe
KWAKIKIZWA kuboshwa owesilisa (30) osolwa ngokudubula indodana yekhansela laseMlaza ngesikhathi ivakashele umzala wayo ehostela eGlebelands.
Yize izakhamuzi zasehostela zingathandanga ukuphawula kwiSolezwe kodwa kuthiwa kwakikizwa kwashaywa namakhwela abahlali basehostela bejabulela ukuboshwa kwale ndoda.
UMnuz Nsindiso “Nsi” Nyawose, oyindodana yekhansela laku-ward 79 uMnuz Sthenjwa Nyawose, namanje uthe akazi wasinda kanjani bedutshulwa nomngani wakhe eGlebe ekuqaleni kwale nyanga.
Icala lakhe uthe kwakuwukushaya ihuthi ngesikhathi ezobheka umzala wakhe. Ngebhadi umngani wakhe wadubuleka ekhanda washonela esibhedlela yena wasala namanxeba okudutshulwa.
UColonel Thembeka Mbhele wamaphoyisa KwaZulu-Natal uthe amaphoyisa abhekele ubugebengu obuhleliwe eMlaza nawophiko lwezobuNhloli atheleke eGlebelands efuna izibhamu ezingekho emthethweni ngoLwesithathu ebusuku.
“Umkhankaso uthele izithelo ezinhle ngoba kuboshwe umsolwa oneminyaka engu-30 otholwe nesibhamu i-9mm nezinhlamvu ezingu-44. Kutholwe neToyota Etios eyadunwa ngo-Ephreli, eMbilo. Umsolwa kutholakale ukuthi uyathinteka ekudutshulweni kwabesilisa ababili abadutshulwa bevakashele umngani wabo ehostela, oyedwa oneminyaka engu25 omunye onengu-27. Kuphinde kwavela ukuthi uyathinteka nasekudutshulweni kowesilisa ngoJuni 9 owadutshulwa ezihambela eGlebelands ntambama,” kusho uColonel Mbhele.
Uthe uzobekwa amacala okudubula, ukutholakala nempahla eyebiwe, ukuphatha isibhamu nezinhlamvu okungekho emthethweni nelokweba imoto.
Isibhamu sizohlolwa ukuthi asithinteki yini kwamanye amacala kanti umsolwa uzovela namhlanje enkantolo yeMantshi eMlaza.
UMkhuzi wamaphoyisa KwaZuluNatal uMajor General Bheki Langa uthe amaphoyisa azoqhubeka nokubonakala eGlebe ukulwa nobugebengu.