Abadansi benze okwehlukile ngolweNtsha
INTSHA yaseThekwini engabadansi isebenzise amakhono ayo ukukhuza ukuhlukunyezwa kwabesifazane kuleli.
Le ntsha yenze okwehlukile ngoLwesihlanu ngesikhathi ihamba onqenqemeni lomgwaqo idansa iphethe nezingqwembe ezinomyalezo wokukhuza ukuhlukunyezwa kwabesifazane.
Ihambe ngomgwaqo uPixley ka Seme yaze yafika eShaka Marine.
U-Ikmal Anisse odabuka eComoros Island kodwa osezinze kuleli, ongumholi wale ntsha, uthe bajwayele ukusiza izingane ezihlala emgwaqweni ngokuzifundisa umdanso uma kuyizimpelasonto ngoba benzela ukuthi zike zikhohlwe ukubhema izidakamizwa.
“Uma sinalezi zingane siyaye sibe sodwa kodwa othandayo ukulekelela uyalekelela, abanye bayabuza ukuthi senzani bese siyabachazela. Nakulokhu sibone ukuthi sizodansa siphethe izingqwembe onendlebe nonothando lokusilalela, uzosizwa,” kusho u-Annise.
Laba badansi bebehamba bekhombisa izindlela okuhlukunyezwa ngayo abesifazane, okubalwa kukho ukushaywa nokudlwengulwa. Le midanso ibihambisana nomculo.
“Sithe nathi njengentsha edansayo ake senze okuthile ngekhono esinalo singakhathalele ukukhokhelwa ngoba singabadansi abakhokhelwayo. Usuku lonke lwethu sizoluchitha ngokudansa sikhombisa ukuhlukunyezwa kwabesifazane siphinde sikhuze lo mhlola,” kusho yena.