Khuluma iqiniso uma ufuna umshwalense ukukhokhele
EZABATHENGI
UMXAZULULI womshwalense wesikhashana uNkk Deanne Wood, uxwayise abantu ngokubaluleka kokukhuluma iqiniso ngaso sonke isikhathi.
UNkk Wood uveze ukuthi abanye abantu abafaka izikhalo ehhovisi lakhe abasitholi isinxephezelo ngenxa yokuqamba amanga.
“Uma umuntu efaka isikhalo sokuthi umshwalense awuzikhokhanga izindleko emuva kokuthi imoto yakhe ibe sengozini ngisukumela phezulu ngiphenye. Kube buhlungu ukuthola ukuthi abanye abangitsheli lonke iqiniso. Ngithole ukuthi abazali bathenga izimoto bazinike izingane zabo, uma sezishayisile izimoto umzali ufaka isicelo sokunxeshezelwa. Ngebhadi umshwalense awukhokhi ngoba imoto isuke ishayelwa yingane ngoba kumafomu omshwalense kubhalwe ukuthi imoto izohlale ishayelwa ngumzali,” kusho uNkk Wood.
“Okwenza amanga abazali ahlale obala wukuthi izingane zifaka izithombe ezinkundleni zokuxhumana. Ngaphambi kokuthi inkampani yomshwalense ikhiphe isinxephezelo yenza uphenyo olunzulu bese uma ithola ukuthi umuntu akakhulumanga iqiniso inqabe ukukhokha,” kusho uNkk Wood.
Ugqugquzele abantu ukuthi bakhulume iqiniso ngaso sonke isikhathi ukuze umshwalense ukhokhe uma kwenzeka ingozi yemoto noma kwebiwa okuthile endlini.
“Okwenza ukuthi abazali baqambe amanga wukuthi abantu abadala bakhokha imali encane uma kuqhathaniswa nentsha. Akulungile ukuqamba amanga ngoba uma sengibona ukuthi imoto yakho ngosuku lwengozi yayishayelwa yindodana yakho iziyela emjuxuzweni kwenza ngingabi namandla okuphoqa inkampani yomshwalense ukuthi ikunxephezele,” kusho uNkk Wood.
Uthe izinkampani zomshwalense kufanele zihehe amakhasimende ezinkundleni zokuxhumana zifundise abantu ngokubaluleka kokukhuluma iqiniso.
UNkk Wood unamandla okushushisa zonke izinkampani zomshwalense wezimoto, owezindlu, owamabhizinisi nokunye okufakwa kumshwalense isikhathi esifushane.
Kulo nyaka usebuyisele uR100 million kubantu abebefake izikhalo ehhovisi lakhe. Uveze ukuthi uthole izinxephezelo ezingu-14 916, washushisa amacala angu-10 175.
Zingu-8 631 izikhalo ezixazululiwe kwaze kwavalwa namafayela okusho ukuthi izinkampani zomshwalense zikhokhele abantu ngaphandle kokukhala.
Uthe ezinye izikhalo zifakwa ehhovisi lakhe bese ezibuyisela enkampanini yomshwalense izixazulule, uma ihlulekile uyazithatha bese eshushisa inkampani yomshwalense.
Amacala afakwe ehhovisi lomxazululi wezindaba zomshwalense wesikhashana aphuma nesixazululo kungakapheli izinsuku ezingu-90 kanti amacala amaningi awatholayo ngawemishwalense yezimoto.
Udonse ngendlebe abantu ukuthi baqale bafake isikhalo enkampanini yomshwalense ngaphambi kokuthi bayokhala ehhovisini lakhe.
Ukufaka isikhalo abantu bangaya ku-www.osti.co.za noma ufonele u-011 726 8900 naku0860 726 890, ungathumelela i-e-mail ku-info@osti.co.za
Khonamanjalo, selokhu ngibhale udaba lukaNksz Monica Kubheka owayethunyelelwe iphasela elivela e-England kodwa angakalitholi namanje sengithole eminye imibuzo ngabantu abakhala ngokungawatholi amaphasela abo.
Omunye wabo nguNksz Thandeka Ntshangase ongitshele ukuthi wathunyelelwe iphasela elivela eLondon kodwa akakalitholi ngenxa yokuthi inkampani eliphethe i-United Parcel Force Service World Wide ayifuni ukulidedela.
Ungitshele ukuthi iphasela linemali kanti watshelwa ukuthi kufanele akhokhe inhlawulo, wayikhokha kodwa kuze kube manje akalitholi.
Ezabathengi zibathintile abakwa-United Parcel Force Service World Wide kanti obambe ucingo ozibize ngoAmanda uthe ngeke akwazi ukukhuluma nomuntu ongahlangene nephasela.
Ecelwa ukuthi makadlulisele ucingo kumphathi wakhe noma asinike i-e-mail yenkampani uthe imininingwane yenkampani iyimfihlo akakwazi ukuyinikeza omunye umuntu ngoba angaphelelwa ngumsebenzi.
Okuphawulekayo ngezinkampani okukhalwa ngazo wukuthi azinawo amaemails, azinawo amakheli aqondile lapho zisebenzela khona futhi uma unesikhalo abasebenzi bazo babhoka ngolaka.
Ezabathengi zithanda ukuxwayisa abantu ukuthi basebenzise izinkampani ezijwayelekile ezithumela izimpahla, ezinama-emails namakheli aqondile ukuze uma kunenkinga kuzoba lula ukufaka isikhalo.
Ezabathengi zithanda ukuxwayisa abantu ukuthi bafake izikhalo ehhovisi elibhelekele izikhalo zabathengi i-National Consumer Commission etholakala ku-www.thencc. gov.za
Bayatholakala ku-012 428 7000/012 428 7726.