Usule esemoshile nokho uNgubane kwa-Eskom
WENZE kahle wasula uDkt Ben Ngubane njengoSihlalo wakwa-Eskom ngesonto eledlule. Ukuphuma kwakhe kule nkampani kusho ukuthi usungaqala umsebenzi wokukhuculula ngoba wone izinto eziningi ehola ibhodi lenkampani emqoka emnothweni waseNingizimu Afrika.
UNgubane, obephambili ekuvikeleni uMnuz Brian Molefe naye obedicilela phansi isithunzi senkampani, usule isigubhukane ngeledlule kanti noNgqongqoshe wamaBhizinisi kaHulumeni, uNksz Lynne Brown akacucuzanga wayamukela incwadi yokushiya kwakhe.
Isidididi esikwa-Eskom senzeke ngenxa yokuxega kobuholi bukaNgubane. Ngesikhathi engusihlalo webhodi yakwa-Eskom kunezinqumo ezithathwe yinkampani ezishayisa amakhala futhi okubonakalayo ukuthi ekuthathweni kwazo bekungacatshangelwa iNingizimu Afrika kodwa bekuhloswe ukuhlomulisa abambalwa ngazo.
Esakamuva esokuphakamisa ukuthi uMolefe akhokhelwe uR30 million wokuthatha umhlalaphansi emva kokusula njengesikhulu esiphezulu nokuyisinqumo uNksz Brown asichitha.
Kuthe kusabatshazwa lokho, uNgubane nebhodi lakhe bamqoka kabusha uMolefe njengomphathi wakwa-Eskom emva kwezinyanga ezintathu eshiyile eseyilungu lePhalamende.
Inganekwane ebisixoxwa yibhodi ebithi empeleni uMolefe wayengazange asule iphendule izwe lethu inhlekisa futhi kwezinye izinhlanga kwafakazeleka ukuthi abantu abamnyama abakwazi ukuphatha.
Asibonge ukuthi uNksz Brown useshaye phansi ngonyawo ngesinqumo sokubuyisa uMolefe wayalela ibhodi ukuthi alisiguqule isinqumo.
Ziningi izinto ezonakele kwa-Eskom futhi kuyacaca ukuthi izinqumo ebezithathwa khona bezingenzelwa izwe kodwa kunalabo abese bephendule inkampani iyoyo yabo bezenzela umathanda belekelelwa wuNgubane noMolefe.
Ukuphuma kwabo kuzosiza ekubuyiseni isithunzi senkampani noma kungumsebenzi ozothatha isikhathi.
Kuyishwa ukuthi uNgubane noMolefe ngabaholi abebehlonishwa eNingizimu Afrika kodwa ababonakala bevumele ukusetshenziswa ukuze kufezeke izinhloso zabambalwa.