UMthembu nesikweletu kwaMpisane
UKUFANISA nesikweletu okufanele basikhokhele umndeni wakwaMpisane ukuhluleka ukunyukela kwi-Absa Premiership umdlali weRoyal Eagles, uNdabenhle Mthembu, ongomunye wabangase bathole elinye ithuba kuleli qembu.
UMthembu waKwaNongoma ubekade ephelelwa yinkontileka kwi-Eagles kodwa osekuvele ukuthi ubiziwe nabanye abadlali ukuzoxoxa naleli qembu ngezinkontileka ezintsha.
Abanye abadlali okuthiwa babiziwe nguPhilani Shange wodumo kwiLamontville Golden Arrows noPhilani “Philoh” Zikalala waKwaMashu owake waba semabhukwini e-Orlando Pirates.
I-Eagles, okuqina amahlebezi okuthi ifuna ukuthenga iFree State Stars, ihluleke ekugcineni ukuzibekisela indawo emidlalweni yama-Play Off ngesizini ka-2016/2017.
Bekungokwesibili amasizini elandelana leli qembu liphunyukwa yiqatha emlonyeni. UMthembu uthe unethemba lokuthi ngesizini ezoqala bazoyinyusela kwiPremiership i-Eagles.
“Ngingakujabulela ukuqhubeka nokudlala kwi-Eagles. Basithintile sonke bathi asibuye eqenjini. Ngesizini edlule sihluleke kancane ukungena kuma-Play Off.
Inkinga ibe kithina singabadlali, angazi noma kwenziwe wukukhathala noma yingqondo ngoba isigaba sokuqala asisidlalanga kahle. Angazi noma kwenziwe wukuthi kwengezwe abanye abadlali,” kusho uMthembu.
“Indlela abasiphethe ngayo isinikeza isikweletu ngoba ayikho into ongakhala ngayo. Basiphethe kahle, akukho abangasenzeli khona. Indawo yokuhlala isesimeni esihle nezinkundla zisesimeni esihle. Siphatheke kahle ngempela kwi-Eagles. Kusele ngakithi singabadlali ukuthi sinyusele iqembu kwiPremiership. Ngiyacabanga ukuthi kule sizini ezoqala sizolifaka iqembu esigabeni esikhulu. Kufanele silungise izingqondo zethu, sijime. Ngiyajabula ukuhlala khona futhi ngisafuna ukuqhubeka.”
Nakuba kunezinkulumo zokuthi i-Eagles izothenga i-Ea Lla Koto kodwa izinhlangothi zombili aziphumeli obala ngakho.
Leli qembu kulindeleke ukuthi licacise ngekusasa lomqeqeshi u-Allan Freese ofike wakhombisa ukukholelwa kuMthembu odongeni lwasemuva.
UFreese, obeqale isizini edlule kwiHighlands Park uyivale kwiEagles.
UMthembu, owayegijima kwiJomo Cosmos, ungomunye wabadlali baKwaNongoma abahlele umqhudelwano iNongoma Professional Players’ Soccer Tournament osongwe eLindizwe ngoMgqibelo. Inhloso yawo ukuvumbulula nokuthuthukisa ikhono lebhola KwaNongoma.