Ithuba lokubuyisa izinduku kuMosimane
AKUSEKHO ukubuyela emuva kumqeqeshi weMamelodi Sundowns, uPitso Mosimane, osekumele kuye ngamagama enkehli uma iqembu lakhe selitholene ne-Esperance Tunis emdlalweni kaGroup C kwiCAF Champions League.
Umdlalo oseStade El Menzah, eTunis ngoLwesithathu ngo-11 ebusuku, kumele nakanjani iSundowns ilwele ukubuya namaphuzu amathathu noma elilodwa kuwona ngemuva kokulahla amaphuzu agcwele ngesikhathi bedlala kowomlenze wokuqala emasontweni amabili edlule.
Emdlalweni owawusePitoli amaBrazilians ahlulwa ngo 2-1 okuwumphumela angawuthandanga uMosimane wathembisa ukubuyisa izinduku uma sekuhlanganwa okwesibili.
ISundowns ihleli endaweni yesithathu ngamaphuzu amane ewaqoqe emidlalweni emithathu. Eqhulwini kuhleli iTunis ngamaphuzu ayisikhombisa, kulandele iSt George yase-Ethiopia ngamahlanu bese kuvala i-AS Vita engenaphuzu.
“Leli qembu singalishaya ngisho eTunis. Ngiyakholwa yilokho,” lawa ngamanye amazwi ashiwo uMosimane ngemuva kokuhlulwa. Wazithethelela ngokuthi bekunabadlali beqembu lakhe abebengekho ngenxa yokulimala.
ISundowns ifulathele iNingizimu Afrika ngempelasonto isibhekise amabombo eTunisia.
Izohamba isesimeni esingcono ngakubadlali basemuva kulandela ukubuya kukaWayne Arendse ekulimaleni. ISundowns bese isele hlwempu emuva ngemuva kokuthinteka kukaMotjeka Madisha emlenzeni wokuqala neTunis. Lokhu kwaholela ekutheni uMosimane adlalise uSoumahoro Bangaly owadala iphenathi eyawinisa izitha.
Kungenzeka ukuthi uMosimane wazidalela amazinyo abushelelezi ezitheni ngenxa yamazwi awakhuluma ewabhekise kuTunis.
Wayeqhosha ngokuthi akukho azolikhuluma nephini lomqeqeshi weqembu u-Othman Najjar uma engakabi nendebe yeChampions League njengaye. Amaqembu amabili aqede ephezulu adlulela kuma-quarterfinal.
Khonamanjalo kwiCAF Confederation Cup, iSuperSport United izokwamukela iTP Mazembe yaseDR Congo.
Umdlalo use-Atteridgeville Stadium kusasa ngo-7 ebusuku. I-United isendaweni yokuqala kuGroup D ngamaphuzu amahlanu alinganayo naweMazembe neHoroya yaseGuinea.
Lokhu kusho ukuthi Amatsatsantsa kumele awine ukuze azibeke ethubeni elihle lokudlulela kuma-quarterfinal omqhudelwano. Ngakolunye uhlangothi iPlatinum Stars eyibambe emsileni kuGroup B izokwamukela iSfaxien eRoyal Bafokeng ngoLwesithathu ngo-7 ebusuku.