OwePirates ne-United uzohlulela uJonevret: Cele
OWAYEYINJINI ye-Orlando Pirates, u-Andile “Sguda” Cele, ukholwa wukuthi umdlalo wamanqamu weNebank Cup neSuperSport United yiwona ozocacisa ngolwazi lomqeqeshi uKjell Jonevret othwele ijoka lokubuyisa izinsuku zenjabulo eqenjini.
UJonevret ujoyine iPirates ngoFebhuwari ethatha izintambo kumqeqeshi obebambile u-Agusto Palacios.
Isizini ka-2016/2017 kwiPirates iqalwe nguMuhsin Ertugral kodwa wasula isigubhukane emuva kokuthi iqembu libhudluzwe yiSuperSport ngo 6-1. Nokho uJonevret, waseSweden, uhluleke wancama ukushintsha izinto. Iqembu ligcine liqede ngaphandle kwe-Top 8 nokusho ukuthi lizoyibuka nezihlwele imidlalo yeMTN8 okuzovulwa ngayo isizini ka-2017/2018.
IPirates izobhekana neSuperSport emdlalweni wamanqamu weNedbank Cup eMoses Mabhida Stadium, eThekwini, ngoMgqibelo ngo8.15 ebusuku.
UCele, owayegijima kuPirates eminyakeni edlule, ukholwa wukuthi umdlalo uzomahlulela uJonevret.
“Ngifisa ukumbona ejimini, ngizwe ngabadlali abaqeqeshayo, ngimlalele ekhuluma ukuze ngazi ukuthi ungumqeqeshi onjani.
“Kodwa uma ngibheka kulokhu engisakubonile, akakayibambi. Siyethemba ukuthi uJezzy Queen (Harold Legodi) ebhentshini uyamsiza. Kodwa sonke sinendlela yethu yokucabanga ukuthi iPirates kufanele ngabe idlala kanjani. Okwamanje ayichazi ngempela,” kusho uCele.
“Kwesinye isikhathi uma bedlala ubona sengathi bahlanganiswe sekuyodlalwa kodwa banakho konke, banabasizi bomqeqeshi nabama-video. Banabadlali abakhokhelwa imali eshisiwe.
“Uma bedlala, noma ngabe abadlali kahle ngalolo suku kodwa kufanele ubone ukuthi bazama ukudlala ngale ndlela. Kumele badlale into ehlangene kodwa asikuboni lokho. Bangawina namuhla kodwa ngeke uzitshele ukuthi bazowina ngokuzayo.
“Bazodlala iNedbank, sizombona kahle uJonevret ngoba kade enesikwati inyanga yonke ngoba iqembu belilokhu lidlala njalo.”
Ngaphandle kokushintsha abaqeqeshi kwePirates ngesizini edlule, kunezikhalo ngezinga labadlali eqenjini. Maphakathi nesizini lisayinise izitobha uJames Okwuosa noMarc van Heerden abebekuChippa United. Libuyise noThembinkosi Lorch obebolekiswe kuyona iChilli Boys.
Ekuqaleni kwesizini yaqinisa isikwati ngabadlali okukhona kubona uThabiso Kutumela owayeshaya amagoli kwiBaroka kuNational First Division (NFD).
“Wonke umdlali usengayidlalela iPirates manje, asikhulume iqiniso. Kuqala lapho. IPirates neChiefs balingana neBarcelona neMadrid eSpain. Akuyena noma ngubani umdlali ongahlala eduze kukaMessi ezindlini zokushintshela.”
“Uma kwiPirates umdlali ophambili kunguManyisa (Oupa), wonke umdlali angashaya igoli noma amabili kwi-ABC Motsepe League noma engavuthiwe ngaleyo ndlela, ngosuku olulandelayo angazithola esehlezi naye (esethengwe yiBucs).
“Sekulula manje. Kodwa thina ukufika sidlala noMngomeni (Thabo), Sapula (Godfrey) noPollen Ndlanya bephuma phesheya kwakuwumsebenzi onzima. Sasivele sesiqhakazile eNatal, abantu bejabule, sekucacela noma ngubani ukuthi kufanele siye.”