Ithuba kwabadlale kwiMayoral Cup
BAZOTHOLA ingqayizivele yethuba lokuzidayisa emaqenjini agijima kwi-Absa Premiership abadlali abashaye into ecokeme kwiJozini Mayoral Cup ngempelasonto eNdumo Sports Field, eJozini.
Ingwazi yeBafana Bafana, uHelman Mkhalele oseyiphini likaThabo Senong ocija iqembu lesizwe lika-Under 20, noBongano Yengwa, ozakhele udumo emaqenjini esizwe abesifazane, bebeqoka abadlali abadlala namaqembu aKwaZulu-Natal agijima kwiMultichoice Diski Challenge.
UMasipala waseJozini ukhiphe u-R1 million uhlela iMayoral Cup. Wonke amaqembu abedlala kulo mqhudelwano ahlomule ngamajezi okudlala.
UYengwa exoxa neSolezwe ngemuva kwemidlalo udalule ukuthi beneme ngekhono elitshengiswe abadlali baseJozini.
“Besiqoka abafana abangaphansi kuka-21 weminyaka abanesifiso sokudlala kwiPremier Soccer League (PSL). Bazodlala namaqembu adlala kwiMultichoice Diski Challenge.
“Abanye abashaye into ecokeme bazodlulela kwinhlolokhono yabadlali abazomela uMkhanyakude kamaSalga Games. Seneme ngekhono elitshengiswe abafana. “Ngikholwa wukuthi badinga isikhathi ngoba baneminyaka engu-19, 20 no-21. Ziningi izingqinamba abasabhekene nazo ngenxa yendawo abakuyona,” kusho uYengwa.
Abantu baseJozini baphinde bathola ingqayizivele yokubuka izingwazi ezazilihlikihla kudala.
Phakathi kwabadlali abebakhe iqembu lezingwazi zePSL bekukhona uMbulelo “Old John” Mabizela, Siyabonga “Nsimbi” Sangweni, Bheka Phakathi, Tsepo Ntsoane, Siphesihle Ngobese, Papi “Ginger” Zothwane, Vusumuzi “Kanu” Vilakazi, Sandile “AK47” Ndlovu, Andile “Sguda” Cele, Dumisani “Makhokhoba” Ngwenya, Sithembiso “Imoto entshontsha imali” Ngcobo, Sipho Zimba, Nhlanhla Mshibe noNtokozo “Koloba” Sikhakhane.
UMkhalele uphonsele umasipala inselelo yokulungisa izinkundla.
“Izinga belilihle kakhulu kodwa uyabona ukuthi kunamabhawodi axegayo okusamele siwaqinise. Into engijabulisa kakhulu wukuthi bayazinikela.
“Uyabona ukuthi bayalithanda ibhola. Asebekudinga manje wukuthi bathole abaqeqeshi abanamava ukuze bakhule ngendlela efanele. Enye into umasipala okumele ayilungise yindaba yezinkundla zokudlala,” kusho uMkhalele.
UDelani Mabika oyimeya yaseJozini udalule ukuthi bazoqhubeka nokufaka imali kulo mqhudelwano ukuze kuvumbululwe ikhono.
“Sikhiphe u-R1 million sihlela le midlalo. Sizokhipha omunye u-R1 million wokwenza into efana nale ngonyaka ozayo.
Ngaphezu kwalokho sizophinde sikhiphe u-R1.1 million wokusiza izingane ezifuna ukubhalisela ukufunda emanyuvesi. Abantu bayithokozele kakhulu imidlalo.
“Abanye bahlale bebezwa emisakazweni nakuthelevishini laba badlali abebebabonela eduze namuhla. IRoyal Eagles ibikhona izothungatha ikhono. Kunabadlali ezobathatha.
“Ngaphandle kwalokho kunesikwati esizodlala namaqembu adlala kwiPSL. Izinsuku zemidlalo sisazozimemezela. Inhloso yethu wukubona abafana abancane abanekhono bemele indawo yaseJozini esigabeni esikhulu,” kusho uMabika.