Kusathule ngolukaMarawa
ebuzwa ukuthi uzolifulathela nini elakuleli eselibhekise eLA wathi bazohamba ngoLwesine ebusuku.
“Konke sekumi ngomumo futhi sekukuningi okungijabulisayo manje. Ngithole nezindaba zokuthi kukhona abahleli bemicimbi abafuna ukuhlangana nami sixoxe izindaba zebhizinisi ngakho ngijabule,” kusho uBabes.
Uthe ukuya kwakhe emcimbini wamaBET akusikhona nje ukuyocula nokuthamela umcimbi kodwa sekumvulele amathuba nakwezinye izindawo.
I-SABC ayifuni ukuphawula ngodaba oluthinta isilomo seMetro FM, uRobert Marawa, esilaxaze umbhobho ngeledlule sikhala ngokumiswa komdidiyeli wohlelo lwaso.
UMarawa, oshayela uhlelo iMetro FM Sports @ 6 ngo-6 ntambama phakathi nesonto wathi ngeke angene emoyeni engekho umdidiyeli wohlelo lwakhe uBeverly Maphangwa.
UMarawa ubhale ekhasini lakhe le-twitter ngoLwesine ukuthi uBeverly umisiwe emsebenzini ngoba wadlala emoyeni okwakushiwo nguSizwe Mabena weSupersport ohlelweni.
Uthe uphinde wafunda nombono kaBaba Mthethwa naye weSupersport abaphathi bathi lokhu kuyicala ngoba basebenzela izimbangi.
UMarawa uthe utshele abaphathi ukuthi uzohoxa ohlelweni ngoba uye odale lokho.
Izolo okhulumela le nhlangano uKaizer Kganyago uthe akukho azokuphawula ngalolu daba kuze kuba luyaphothulwa.
Ukhumbuze intatheli ukuthi kumele ngabe isiyazi ukuthi: “Asilukhulumi udaba oluphakathi komqashi nomqashwa.”
Ebuzwa ukuthi uMarawa uzozwakala nini emoyeni uthe ngeke aphawule. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.
Ngeledlule uBrian Mofokeng weRadio 2000 uthe wacelwa ngabaphathi ukuthi abambe uhlelo lukaMarawa.
Ucingo lukaMarawa belukhala lungabanjwa.
NgoLwesihlanu uMarawa ubonakale eshuthe noTbo Touch emcimbini wesiteshi iTouch HD.
Umphathi weTouch HD, uMartin Vilakazi, uthe akukho okumangazayo ngalokhu ngoba bathathana njengabandawonye.
“Engingakusho wukuthi uyindoda engasebenza nayo futhi angikaze ngixabane nabasakazi ngoba ngiyabahlonipha futhi nabo babengihlonipha. UMarawa usebenzela isizwe eMetro FM okuyinto esiyihloniphayo, asikaze sixoxe naye. Ngiyamhlonipha futhi ngingakujabulela ukusebenza naye,” kusho uMartin owake waphatha iMetro FM.
Umfanise nomgadli weReal Madrid nePortugal uCristiano Ronaldo wathi akekho ongeke akujabulele ukuthi abe seqenjini lakhe kodwa kukhuluma iphakethe.
Bekulindeleke ukuthi uMarawa ahlangane nezikhulu zeMetro FM ukudingida lolu daba izolo.
UMarawa ubengekho izolo ohlelweni, belushayelwa uMpho Maboi owenza ezemidlalo kuFresh Breakfast Show okuwuhlelo olushayelwa uDJ Fresh ekuseni. Isolezwe ligcine lingatholanga ukuthi umhlangano kaMarawa nabaphathi beMetro FM obekuthiwa uzoba ngoMsombuluko (izolo) ugcine uhambe kanjani. Lo mhlangano bekuyiwona obekumele uthathe isinqumo ngoMarawa.