Basale nemibuzo kubulawa u-matron
KUSOLWA ukuthi belifuna imali isoka lika-matron elimnqume intamo, lamqoba ngommese, labe seliziphosa ezimotweni libaleka, lashonela esibhedlela, eMnambithi.
UNkk Busisiwe Ndaba (57) obesebenza esibhedlela iLadysmith ubulewe emzini wakhe eMkhamba, eMnambithi ngoLwesihlanu.
Lokhu kuthiwa kwenzeke phambi kwendodakazi yakhe eneminyaka engu-18.
Osolwa kuleli cala, uMnuz Sthembiso Hadebe (44), naye ugcine eshonele esibhedlela ngoMgqibelo ngemuva kokushayiswa yimoto.
Emuva kokubhokoda uNkk Ndaba ngommese kuthiwa udumele i-battery esemotweni endala egcekeni engasebenzi wazama ukuphuza amanzi ayo.
Kuthiwa uphinde wasuka ngejubane ebaleka nokuyilapho eziphonse khona ezimotweni ebezihamba emgwaqweni washayiseka.
Kuthintwa umndeni kaNkk Ndaba, ubabekazi wakhe uNkk Ntombifikile Gumede, ophinde abe uSomlomo kuMasipala Ugu, uthe bashaqekile futhi badiniwe ngokwenzekile.
“Singumndeni siyazibuza ukuthi kungani ebulele uBusi (Nkk Ndaba), kuyimanje ushonile lo muntu (umsolwa) asazi ubani osezositshela isizathu sakwenzile. Sisele nezinsolo nje, sisola ukuthi mhlawumbe ubefuna imali kaBusi noma izinto zikaBusi ngoba ubesanda kuhola ngomhla ka-15. Konke lokho nje siyafunisela ngoba nombulali obezosiphendula akasekho,” kusho uNkk Gumede.
Isolezwe lithole ukuthi umsolwa ubelokhu ekhala ngokuthi ubelindele i-sms ebika ukuthi imali ingenile ebhange lakhe kodwa ingafiki.
Abomndeni baveze ukuthi bebengenalo ulwazi ngobudlelwano bukaNkk Ndaba nomsolwa kodwa batholile ukuthi bebethandana.
Umyeni kaNkk Ndaba washona eminyakeni eyisikhombisa eyedlule.
UNkk Gumede uthe ubengakaze acabange ukuthi umufi angaba yisisulu sodlame lwasekhaya.
“UBusi ulandele mina emndenini ngokuba unesi njengoba yena egcine esengumatron. Besihlale sikhuluma ngalezi zinto ezenzeka emphakathini zokuhlukunyezwa kwabesifazane ngingazitsheli ukuthi ngelinye ilanga uzoba yisisulu ngale ndlela. Kumele kulwiwe nesihlava sokubulawa kwabesifazane bebulawa abesilisa,” kusho uNkk Gumede.
Uthe kuMasipala Ugu banemikhankaso eminingi yokulwa nalesi sihlava.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa aseMnambithi ayaphenya.
“Owesifazane oneminyaka engu-57 uficwe enqunywe intamo nomzimba wakhe uqotshiwe. Umsolwa ushayiswe yimoto ngesikhathi ebaleka lapho umufi efele khona, naye ugcine eshonile,” kusho uZwane.
Kuthintwa uSomlomo wasoThukela, uNkk Dudu Mazibuko, uthe badumele ngokwenzekile wathi nabo bamatasa nemikhankaso yokulwa nalesi sihlava.
“Owesifazane osuke ehlukumezeka akangahlali, akabike. Sikhathele abantu besilisa ababulala abesifazane ngesihluku njengoba kwenzekile ku-matron. Sekwanele,” kusho uNkk Mazibuko. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.