‘Abathintekayo abasule ezikhundleni’
ABABHISHOBHI bebandla lamaRoma banxusa osopolitiki abathinteka kumaemail odumo i-#GuptaLeaks ukuthi basule ezikhundleni zabo uma lezi zinsolo ziyiqiniso.
UMbhishobhi u-Abel Gabuza, uSihlalo weSouthern African Catholic Bishops’ Conference (SACBC), uthe badumele ngokuvela kwama-email.
“Uma ama-email eyinto ekhona ngempela lokho kukhombisa ukusebenza kukamengameli kanjalo nezinhlelo ezikhona zokumosha izinsiza zombuso,” kusho uGabuza.
Ngenyanga edlule izintatheli ziputshuze ama-email angaphezu kuka-100 000 akhombisa ukungahambi kahle ekukhishweni kwamathenda kahulumeni okuthinta nomndeni wakwaGupta.
Lama-email aveza ukuthi umndeni wakwaGupta uhlomule kanjani kumathenda kwa-Eskom nakwaTransnet.
Aveza nokuthi lo mndeni uphethwe ngezandla ezintofontofo nguMnyango wezaseKhaya kuleli.
“Inkinga yokulawulwa kombuso yidlanzana beyingeke ifike kuleli zinga ukube kunomgomo ophoqa osopolitiki ukuthi banekele izwe ngezipho abazitholayo, sinxusa wonke amaqembu ezombusazwe ukuba abambisane kushaywe lo mgomo ePhalamende,” usho kanje.
UGabuza uthe bangafisa ukuthi i-ANC engqungqutheleni yayo yemigomo ngoJuni ixoxe ngodaba lokusungulwa kwe- AntiCorruption Court ezoba nabashushisi namajaji akhethekile.
“Le nkantolo ingasiza ekutheni kusheshiswe amacala ahlobene nenkohlakalo nokukhwabanisa,” usho kanje. UGabuza uthe yize ubugebengu bebukhona ngaphambi kokuthi uZuma angene ehhovisi kodwa manje sebubuningi.
“Izinsolo zenkohlakalo ezilokhu zivela njengoba kuphethe uZuma zehlisa isithunzi sombuso,” usho kanje.
UGabuza uphakamise ukuthi kuqokwe abaholi abazoletha inqubekelaphambili ezweni. “Uma siqhubeka nokuba nomengameli nongqongqoshe abathinteka ezinsolweni zenkohlakalo, lizoqhubeka isiko lenkohlakalo kube nzima ukuliqeda,” usho kanje.