Ukhalile ehluleka wukuqeda umjaho
UVELE wakhihla isililo umfana (14) ehluleka ukunqoba umjaho ka-10km abesethembele kukho ukuze ashintshe isimo sakubo.
ULungisani Mathonsi ofunda uGrade 6 eNgaqa Primary, eMtubatuba, ubehlanganyele emjahweni iQapheqolo Save the Rhino, obugijinyelwa kule ndawo ngeSonto. Uqede ukugijima wazibhonqa phansi. Iningi lezithameli lizitshele ukuthi ukhaliswa yizinhlungu zokuthatha ngamawala kwazise ushiye abaningi eqeda endaweni yesi-20 kubagijimi abangu 330.
Ngesikhathi ebhuquza phansi kube khona ukusolana kubahleli bomcimbi abebecabanga ukuthi bekungamele avunyelwe ukugijima ibanga ngoba usemncane.
Ebuzwa ngesenzo sakhe, uLungisani uthe: “Bengifuna ukunqoba ukuze ngithole imali yokwakhela umama. Ekhaya siwu11 silala ndawonye ngoba izindlu zintathu kuphela futhi zakhiwe ngodaka. Ngelinye ilanga sike siye esikoleni singadlile ngoba umama akasebenzi, uthembele emalini yesibonelelo sikahulumeni nempesheni kagogo. Ubaba washona ngo-2014. Ngikhethe u-10km ngoba ngicabanga ukuthi unemali engcono kuno- 5km.” Imali ebizowinwa wu-R2000. Abahleli bomjaho – ikhansela nosomabhizinisi wendawo – baphikelele kwabo bafike bazibonela isimo esingesihle somndeni. Bafice uninakhulu kaLungisani, uNkk Hlalisile Mathonsi, naye okhale ngokuthi sekudingeka ukuthi aqukulwe uma ephumela emnyango ngenxa yokuthi akasakwazi ngisho ukuzihambela.
“Isimo sakulo muzi silukhuni. Izingane ziphila kanzima nami kuze kudingeke ngiqashe imoto uma ngiya kohola ngoba sengaba yinto ehlala ilele ngenxa yokukhula,” kusho uNkk Mathonsi.
UMnuz Patros Thethwayo, ongusomabhizinisi, uthembise ukwakhela umndeni indlu enamagumbi amathathu. Ikhansela, uMnuz Mxolisi Mthethwa, wathembisa igilosa ka-R1000 izinyanga ezinhlanu.