Zinobungozi iziphuzo ezinoshukela
IZIPHUZO ezinoshukela zinomthelela ekutheni abantu bangenwe yizifo.
Abantu abaningi bavame ukuvuka ekuseni baphuze itiye noma ikhofi, balifake ushukela omningi bangaboni nkinga kulokho. Abanye bathi uma bedla baqinisekise ukuthi behlisa ngejusi noma isiphuzo esihlohlozayo.
Inhlangano eqwashisa ngezempilo, iHealthy Living Alliance (HEALA), ithi ukuphuza iziphuzo ezinoshukela kunobungozi.
Le nhlangano isanda kukhipha isikhangiso esichaza ngomonakalo odalwa yiziphuzo ezinoshukela. Isikhangiso sikhombisa umuntu wesifazane ophuza iziphuzo ezinoshukela eziningi ngosuku ngaphandle kokucabanga ngomthelela lokhu akwenzayo okunawo empilweni yakhe.
Umxhumanisi weHEALA, uNksz Tracey Malawana, uthe abantu baphuza iziphuzo ezinoshukela yize bazi ukuthi azibalungele.
“Abantu baseNingizimu Afika bayaqhubeka nokuphuza iziphuzo ezinoshukela yize bazi kahle ukuthi zinomthelela ongemuhle empilweni yabo nokuthi zingaholela ekutheni bazithole bekhuluphele ngokweqile, benesifo sikashukela, isifo senhliziyo, ukubola kwamazinyo nokunye,” kusho uNksz Malawana.
Elakuleli lingelinye lamazwe ahamba phambili emazweni angu-10 aphuza kakhulu iziphuzo ezinoshukela. Amazinga okuphuzwa kwalezi ziphuzo kukhula ngo-3% njalo ngonyaka.
Kusanda kuvela ukuthi ukuphuzwa kwalezi ziphuzo kunyukile emakhaya adla imbuya ngothi.
Imibiko yakamuva iveza ukuthi ukuphuzwa kweziphuzo ezinoshukela omningi kunomthelela ongemuhle kuwo wonke umuntu, yilowo oziphuzayo nabasondelene naye ngoba uma esegula usuke esedinga ukunakekelwa wumndeni wakhe.
Ngokwezibalo zakwaStats SA isifo sikashukela singesinye sezifo ezihamba phambili kubantu besifazane bakuleli.
Isifo sikashukela sidalwa yizinto ezehlukene kodwa kuleli sincike ekukhuluphaleni kwabantu ikakhulu kubantu besifazane.
ENingizimu Afrika balinganiselwa ku-10 million abantu abadala abakhuluphele ngokweqile. Umbiko osanda kwethulwa yi-Institute for Health Metrics and Evaluation uveza ukuthi izingane zakuleli ezikhuluphele ngokweqile zilinganiselwa ku-1.6 million.
UNksz Malawana uthe kufanele elakuleli lithathe izinyathelo ezinqala ukulwa nesimo sokukhuluphala ngokweqile kwabantu, okunye kwalokhu kungaba wukusheshiswa kohlelo lokufakwa kwentela eziphuzweni ezinoshukela.
Imibiko yangaphambilini ikhombise ukuthi ukufakwa kwentela eziphuzweni ezinoshukela kunganomthelela omuhle ekuvikeleni izifo.
UNksz Malawana ukhuthaza abantu ukuthi baqhele eziphuzweni ezinoshukela ngoba lokhu kungukhiye ekunciphiseni isibalo sabantu abakhuluphele ngokweqile nasekuvikeleni izifo.
“Ziningi ezinye iziphuzo eziqeda ukoma ezingaphuzwa abantu ezingenawo ushukela omningi, kumele siphuze amanzi ngendlela esiphuza ngayo iziphuzo ezinoshukela,” kusho yena.