Ubuhlungu besisu nembilaphu
NGIYE ngathola isicelo sokuthi ngiphinde ngikhulume ngeminjunju eba sembilaphini nobuhlungu obusikayo besisu esingakuhambisi kodwa esikujuqa kuze kube buhlungu nomgogodla neqolo. Angithi qaphu qaphu kafushane nje ngithi lesi sisu sigcina simuthathe isigubhukane umuntu onaso ngenxa yomonakalo owenzeka ngokushesha ngaphakathi ohambisana nokugqashuka komthambo omkhulu nokopha okumangalisayo.
Baningi abantu abatheleka ezikhungweni zezempilo bekhala ngembilaphu ebuhlungu esize yakuqhina wangakwazi nokuhamba.
Ukukhonkobala kuyadlulela uma kuyizimbilaphu zombili ezithintekayo. Angikhulumi lapha ngembilaphu ebuhlungu ngoba ivuna isilonda, kuthi kungekho silonda kodwa kube buhlungu lokhu okuhayizisayo. Ungagcina ungasakwazi nokuhamba usuqhutshwa ngenqola uma unalobu buhlungu. Ake siqale sibuke ukuthi yini lena esembilaphini futhi sibuke umsebenzi walezi zinhlaka ezikule mbilaphu. Embilaphini kukhona:
Ithambo lenyonga elineqhutshana okuthiwa yi-lesser trochanter
Okusaketshezana okuthe shaye kuzungeza leliqhutshana lethambo okuthiwa yi-bursa
Imithambo ehambisa igazi elisuka enhliziyweni naleyo ebuyisela igazi esibindini ligcine lingene enhliziyweni seliyohlanjwa emaphashini.
Imizwa exhumanisa ukulawulwa komzimba, ubuchopho nobudlelwano babo nesingezansi.
Izicubu, imisipha nontwentwesana oluzungeze izicubu.
Yilezi zindawo ezithintekayo uma kunobuhlungu obusuka kuleli qhutshana esilibiza ngokuthi yi-lesser trochanter. Umsebenzi waleli qhutshana elisethanjeni leli elide lethanga wukuba yisizinda sokunamathela kwemisipha yezicubu ezisezinhlangothini zomzimba. Lezi zicubu nemisipha yazo yikona okugaxelise inyonga, wena owabona umgibe uthwele amacansi okanye kulenga izingubo kuwona. Ngichaza kanjena ngoba ngifisa sibone ukuthi ukulimala noma ukuvuvukala koketshezana olukuleli qhutshana engike ngakhuluma ngalo kuletha ukunkenketha okuzwakala embilaphini, enyongeni, eqolo, kule ndawana esesinxeleni nakwesokudla eqolo, indawo engezansi lena esamsila weqolo, nomhlubulo uqobo. Lokhu kwenziwa wukwakhelana nobudlelwane obukhona phakathi kwalezi zingxenye zomzimba. Yingakho ubuhlungu embilaphini buletha:
Ukunkenketha kwayo imbilaphu uqobo
Ubuhlungu obehla nethanga ngaphakathi bubabele enhla nedolo ngaphakathi
Ukunkenketha okungehla njalo buthinte umfasankomo buze bufike eqakaleni nasonyaweni uqobo.
Esingezansi esithintekayo singavele sixege sigedezele kungabibikho ukuxhumana kwamajoyinti.
Ubuhlungu benyonga, iqolo nezindawo eziphahle lona iqolo
Ubuhlungu bemihlubulo okwenyuka nayo kuye ngasezimbanjeni ezingezansi.
Le minjunju ayibekezeleleki, iba sankwantshu, igwaze, ikhonke esingezansi kungahambeki. Umfasankomo uvele ufase idolo lingakwazi ukugoba kube nzima ukunyakaza. Ukuhlala phansi kukukhumbuza ukuthi uzojikelezela ngapha nangapha uma ususukuma ngenxa yezinhlungu nokuqinelana komfasankomo, unyawo nenyonga.
Izinhlungu ziba mandla kakhulu uma sekubuhlungu naleli qhutshana laleli thambo lethanga elingaphandle kwalo okuthiwa yi-greater trochanter. Phela lona linamathelisa imisipha yezicubu yezinqe yingakho ukuthinteka kwayo kuletha ubuhlungu ezinqeni kuze kuyobamba nangasemuva komlenze yehle njalo iminjunju iyothi cababa onyaweni nangaphansi kwalo. Lezi zinhlungu ziyakhinyabeza kakhulu kanti zingenza ukuthi esingezansi sigcine singasakwazi nokunyakaza.
Okukhuthazayo ngazo zonke lezi zinhlungu wukuthi ziyelapheka ziphele nya. Okubalulekile wukuthi ukwelashwa kwazo akufuni ukugqagqanise kodwa kumele kulandelane eduze ukuze ungaqali phansi njalo uma usuya kudokotela.
Ngifisa ukuvalelisa ngalesiya sihlokwana engike ngasithi jwaphu sesisu esibuhlungu kodwa esingakukhiphi. Lesi sisu sibangwa wukukhukhumala kwengxenye ethile yomthambo omkhulu osuka enhliziyweni. Umthambo okuthiwa yi-Aorta uvele unwebeke sengathi yibhelunde. Ubuhlungu besisu bubizwa nge-Aortic Abdominal Aneurism edalwa wukunwebeka ngamandla. Ukunwebeka kuqala kancane, bese kuthi esigabeni esithile kunwebeke kakhulu bese kuqala ukuthi kube buhlungu isisu neqolo. Imilenze nayo ayisali ngaphandle iyaqaqamba, ube nesiyezi, uphathwe yikhanda nenkwantshu ithi ngila.
Lesi sifo sivame ukuphatha abantu asebekhulile kusukela kwabaneminyaka engu-60 ngenxa yokuthi imithambo yegazi iba lula ebudaleni. Lokho akusho ukuthi abangaphansi kwale minyaka ngeke babe naso. Yingakho kubalulelekile ukuthi udokotela okanye abamafutha bakuhlole njalo ukuze baqinisekise ukuthi awunaso lesi sifo. Ukufuthelana kwale mithambo kuholela ekugqashukeni kwayo bese kuba khona ukopha ngaphakathi okunamandla. Ukusinda kusona kuncika ekutheni usheshe kangakanani ukuhlinzwa ukuze kukhishwe le ndawana esizinwebekele. I-Aneurysm iyenzeka nakwezinye izindawo ngaphandle kwasesiswini, njengasesifubeni nasentanyeni.
Umyalezo lapha uthi musa ukuhlala nesisu esesahlala sibuhlungu kuze kutheleleke iqolo nomgogodla ngoba kungenzeka ukuthi uhlezi nalesi sifo esinweba imithambo ibe yibhelunde okuthiwa yi-Aneurysm. Mpilonhle Mpilonde!