Kuthenjwe umphakathi ngesikole esilungisiwe
KUKHUZWE isihlava sokucekelwa phansi kwezikole ngamasela adayisa ngempahla yesikole, ngesikhathi abakwaSanlam bethula ngokusemthethweni uhlelo lokulungisa kabusha isikole iMaqadini Primary esikwa-L, KwaMashu, izolo.
UNkk Smangele Nzama onguthishanhloko wesikole, ubonge iqhaza elibanjwe yile nkampani ebilungisa isikole.
“Njengoba sekukuhle kanje, sifisa sengathi kungahlala kunje. Sithembele kumalungu omphakathi ukuthi asiqaphele sona ikakhulu kubafana ababhema iwunga okuyibo abagcina sebekhipha izicabha namawindi bayokudayisa. Siyazi ukuthi ngesikhathi bentshontsha basuke bezodayisela wona amalungu omphakathi, ngakho umphakathi siyethemba ukuthi uzosilekelela ukugwema lobu bugebengu ngoba isikole ngesethu sonke,” kusho uNkk Nzama.
Ubonge amalungu omphakathi okuthiwa abeselala khona esikoleni egada ubusuku nemini, njengoba lesi sihlava besiya ngokudlanga.
UMnuz Xolani Ngubane obengomunye wabebeqashelwe ukuthi balungise isikole uthe abakwaSanlam bafike bona bengamalunga omphakathi sebeqalile ukuvala izintuba ezingenela esikoleni okusolakala ukuthi zivulwa ngamasela uma ezokweba.
“Ngemva kokuthi sithole umbiko wokuthi sekukhishwe amawindi angaphezu kuka-50 ngamasela ewadayisa khona endaweni, sinqume ukuthi senze okuthile ukuzama ukunqanda lo mkhuba. Senza isiqinisekiso sokuthi nasebusuku ikakhulukazi thina esakhe eduze kwesikole siyaphuma sibheke ukuthi yonke into ihamba kahle. Njengoba iSanlam isifake isandla ilekelele ukuthi isikole siphinde sibukeke kahle, sizokwenza isiqiniseko sokuthi siyaqhubeka nokuqapha ukuze kungabe kusaba bikho okuntshontshwayo ngoba ukuthathwa kwempahla yesikole kusibuyisela emuva,” kusho uNgubane.
Umsebenzi wokulungiswa kabusha kwesikole, uqale emasontweni amabili edlule ngemuva kokuthi uMnyango wezeMfundo unxenxe le nkampani ukuthi ilekelele. Kufakwe izicabha ezintsha, amawindi saphinde sapendwa kabusha. Kuphinde kwalungiswa nezindlu zangasese.
UNkk Heather Reed ovela kwaSanlam uthe lokhu bakwenza ngenhloso yokuqinisekisa ukuthi izingane zifunda esimeni esifanele.
“Okwethu ukuthi siqikelele ukuthi sicabangele ikusasa lezingane zethu. Siyathemba ukuthi umphakathi uzokwenza isiqiniseko sokuthi isikole sihlala sikulesi simo,” kusho uNkk Reed.