Izikhulu ziyangiziba: ofuna esobukhosi
UMNUZ Thokozani Mbonambi othi nguye okufanele abe yinkosi yesizwe saKwaMbuyazi esiseNyakatho yesifundazwe usola uNgqongqoshe wezokuBusa ngokuBambisana neziNdaba zoMdabu KwaZuluNatal, uNkk Nomusa DubeNcube, ngokuthalalisa ngalolu daba.
UMbonambi uthe uqale ukuxoxa nezikhulu zoMnyango wezokuBusa ngokuBambisana nezindaba zoMdabu ngonyaka odlule ebeka udaba lwakhe lokuthi kufanele kube nguye ophethe.
“NgoMashi ngabika ukuthi ngikhona njengendodana yasendlunkulu yaKwaMbonambi futhi kufanele ngibe yinkosi ngoba selokhu kwakhothama inkosi uManqama Mbonambi ngama-1970s kulokhu kungena amabamba. Mina ngikhona ngiyindodana kaMfuthozungiyani olama uMathibela okunguyena inkosazana kandlunkulu uMaShangase. Izikhulu zikahulumeni zangiyalela ukuthi ngize nawo wonke umlando ofakazela ukuthi ngingowasendlunkulu, ngeza nawo kodwa manje sebeyangiziba. Ngicelile ukuthi kungenelele ungqongqoshe kodwa ngiyazitshwa. Angisazi ukuthi kufanele ngenzenjani,” kusho uMbonambi.
Uthe kuphela imali egqigqa izindaba zasendlunkulu yakwaMbonambi, ngaseRichards Bay, yingakho esekhethe ukuza kwiSolezwe ukuze nabalubonayo udaba lwakhe bamlekelele.
“Ngifisa uNgqongqoshe uDube-Ncube alucubungule udaba lobukhosi baKwaMbonambi ukuze kube noxolo ngoba njengamanje kuyabangwa futhi abantu abazitholi kahle izidingo zabo. Sinezimayini kulowa mhlaba ezifanele ukuthi zilekelele abantu kodwa njengamanje akuqondakali ukuthi imali izodedelwa inikwe bani ozokwenza izidingo zesizwe njengoba kubangwa isihlalo sobukhosi,” kusho uMbonambi.
Esitatimendeni esithunyelelwe kwabezindaba nguMnuz Msawakhe Mayisela, iphini leMenenja elibhekelele ezokuxhumana eMnyangweni wezokuBusa ngokuBambisana neziNdaba zoMdabu KwaZuluNatal, ukuqinisekisile ukuthi uMbonambi uke weza izikhawu eziningana kodwa wathi akusilo iqniso ukuthi uyazitshwa.
“UMbonambi ubhalele umnyango incwadi yase idluliselwa emndenini ngoba izindaba zobukhosi azidingidwa ngumnyango kodwa kuba ngezomndeni. UMbonambi uthi nguye ofanelwe wukuba sesihlalweni sobukhosi hhayi uMkhanyiseni noma uSbusiso kodwa umndeni uyakuphika lokhu. Udaba uludlulisele kwiANC esifundeni iMusa Dladla. Umnyango uhambile wachaza okwenzekayo. UMbonambi bekufanele ayofaka isikhalo sakhe kwiKhomishini yeziNdaba zoMdabu ngoba umnyango awungeni ezindabeni zomndeni,” kusho uMayisela.
Uthe ikhomishini ebhekelele izindaba zobuKhosi beNdabuko nezikhalo ayisazithathi izikhalo ezintsha ngenxa yokuthi isikhathi sayo sokusebenza siyaphela kulo nyaka.
Uthe uNdunankulu uzoqoka enye ikhomishini ezobhekelela lezi zindaba wase ecela uMbonambi ukuthi afake isikhalo sakhe kuyo uma udaba lwakhe lungakaxazululeki.