Uqokwe njengomdlali ovelele owamaBaby Boks
ISIDLAKELA samaBaby Boks esinguJuarno “Trokkie” Augustus (osesithombeni) siqokwe njengomdlali obaqwaqwade bonke emakhanda emqhudelwaneni i-Under 20 Rugby World Championship esongwe ngempelasonto kunqoba amaBaby Blacks ashaye i-England kowamanqamu.
AmaBaby Boks, akhishwe yi-England kowandulela owamanqamu, azisule izinyembezi ngokunenebula iFrance ngo 35-15. Lo mphumela ufana ncamashi kula mazwe kodwa kwabadala koweCastle Lager Incoming Tour obuseThekwini ngoMgqibelo.
U-Augustus umenyezelwe njengovelele ngeSonto ebusuku emcimbini owubukhazikhazi obuhlelelwe ukusongwa kwalo mqhudelwano othathe amasonto amathathu edolobheni iTbilisi, eGeorgia.
Lo mdlali odume ngelikaTrokkie (iloli) kozakwabo, uqokwe kufanele ngoba kuyona yonke imidlalo yamaBaby Boks kulo mqhudelwano ushaye i-try. Ugcine eshaye ama-try ayisikhombisa emqhudelwaneni okumenze wahamba yedwa ngoba akekho omunye ofinyelele kulesi sibalo.
Emdlalweni wokuqala u-Augustus ushaye ama-try amabili koweFrance umqhudelwano uqala. Ukwenze kanye lokhu koweGeorgia waphinda nakowe-Argentina. Ngesikhathi amaBaby Boks ebhekene ne-England kowandulela owamanqamu ushaye amabili wase evala ngeyodwa endleleni yeqembu lakhe liyodla indondo yethusi kubhekwene nayo futhi iFrance.
Kulokhu kuhlabana u-Augustus uhlule ukaputeni we-England uZach Mercer nomunye futhi wamaNgisi, uGabriel Ibitoye, noweNew Zealand uTiaan Falcon.
“Akukholakali okwenzekile. Angikaze ngizicabange ngidla umhlanganiso ngiqhathwe nabantu abanzima kanje. Kungenza ngizizwe ngihloniphekile lokhu. Ngeke futhi ngikukhohlwe ngoba kukhulu kunayo yonke into esike yenzeka empilweni yami. Ngibonga abazali nomndeni, ozakwethu nabaqeqeshi bami.”
AmaBaby Boks azotheleka eKapa namuhla kanti kuhlelwe isithangami nabezindaba ngo-12.30 emini esikhumulweni sezindiza lapho kuzokhuluma khona yena u-Augustus noChean Roux umqeqeshi.