Akukubi njengoba bekucatshangwa kuManyongo
ASISIBI kakhulu isimo kumdlali we-long jump, uLuvo Manyongo, ophethe amathemba eNingizimu Afrika okubuya nendondo yegolide ku-IAAF World Championship eLondon no-Agasti.
UManyongo uphinyikile ngesikhathi egxuma emzuliswaneni wokugcina emlenzeni we-IAAF Diamond eStolkholm, eSweden, ngempelasonto.
Yize lo mdlali ohamba phambili ohlwini lwe-IAAF kwi-long jump emhlabeni kulo nyaka, egcine ngokulimala kodwa nguyena ophume phambili.
Emzuliswaneni wokuqala ugxume ibanga elingu-8.36m nokumbeke phambili. Umkhaya wakhe uRushwal Samaai uphume endaweni yesibili (8.29m) kwathi uKhotso Mokoena walala isithupha ngebanga elingu-7.98m.
Ngemuva kwemidlalo, uManyonga uphuthunyiswe esibhedlela eyoxilongwa ngemishini ukubheka umonakalo.
Ngokwemibiko eqhamuke izolo ekuseni eSweden, isimo asikho bucayi.
“Izithombe ze-X Ray zikhomba ukuthi lo mgxumi ohamba phambili emhlabeni uphinyilike unyawo lwakhe (lwesokunxele) kodwa akazange aphuke njengoba bekucatshangwa,” kusho imibiko eqhamuka eSweden izolo.
I-website, i-www.iaaf.org ibike ukuthi uManyonga ubonakele ehhotela ehamba ngenduku.
“Yize kuqinisekisiwe ukuthi akazange aphuke kodwa kuzomele abuye ahlolisiswe kahle ukuthi awukho omunye umonakalo.”
Uma kutholakala ukuthi uManyonga udinga ukuhlala ukuze alulame kungenzeka aphuthwe umlenze waseMorocco ongoJulayi 16.
Usenqobe imilenze emibili, owaseStockholm nowaseShanghai. Ngokwenza njalo uzibeke ethubeni lokungena kweyamanqamu yeDiamond League ezoba ngoAgasti eZurich. Ngokwamaphuzu uSamaai aseqoqiwe ulele endaweni yesibili. Umdlali ogcina edle umhlanganiso ugoduka nesheke lika-$50 000 nendebe yeDiamond League. Ngokunqoba umlenze ngamunye uthola u-$10 000.