Sizimisele ukubhekana nomsebenzi osimele: Pitso
AKAYIZWA eyokuphuma esigabeni samaqoqo umqeqeshi weMamelodi Sundowns, uPitso Mosimane, njengoba ezakhe zizothuthana ne-Esperance Tunis emdlalweni kaGroup C kwiCAF Champions League.
Umdlalo ukusasa eStade El Menzah, eTunis ngo-11 ebusuku ngokwesikhathi sakuleli.
ISundowns engompetha besizini edlule beChampions League, iza emdlalweni iyibambe endaweni yesithathu eqoqweni layo ngamaphuzu amane.
I-Esperance iyona eqhwakele ngamaphuzu ayisikhombisa. Endaweni yesibili kuhleli iSt George yase-Ethiopia enamaphuzu amahlanu.
ISt George yona izobhekana ne-AS Vita engakawini namuhla ngo-4 ntambama, eKinshasa.
Kwi-video efakwe ekhasini leSundowns ku-twitter izolo, uMosimane obekhuluma nezintatheli zaseTunisia, uthe ufuna ukuthi iqembu lakhe lidlulele kumaquarterfinal.
UMosimane uthe ngeke asibeke emqondweni isimo sokulinyalelwa ngabadlali kodwa okusemqoka ukubhekana nomsebenzi obamele.
“Okubalulekile ukungena emaqenjini ayisishiyagalombili okugcina. Ngithemba ukuthi uma sesingena (esigabeni esilandelayo) bazobe sebebuye bonke abadlali bethu. Asikho isidingo sokuphatheka kabi njengoba siza kwi-Esperance kodwa kumele siqhubeke nokulwa ukuqinisekisa ukuthi singena kumaquarterfinal,” kusho uMosimane. ISundowns ihlulelwe ekhaya ngo 2-1 yi-Esperance emlenzeni wokuqala. Kubadlali abebengekho kulowo mdlalo ngenxa yokulimala, kukhona u-Anthony Laffor ongomunye wabashaye amagoli beshaya iVita ngo 3-1 ekuhambeni.
ULaffor useluleme kanjalo noHlompho Kekana emasontweni edlule ohoxiswe eqenjini lesizwe iBafana Bafana ngoba elimele. UKhama Billiat naye obengekho emlenzeni wokuqala, uhambile neqembu ukuya eTunisia. ULaffor ekhuluma ku-website yeSundowns ngesikhathi befika eTunis, uthembise ukubuya namaphuzu agcwele.
Amaqembu azoqeda endaweni yokuqala neyesibili azodlulela azodlulela kuma-quarterfinal.
Khonamanjalo, namuhla iSuperSport United izobhekana neTP Mazembe e-Atteridgeville ngo-7 ebusuku emdlalweni weCAF Confederation Cup.
Kusasa iPlatinum Stars izokwamukela iSfaxien eRoyal Bafokeng ngo-7 ebusuku.