Uzohlomisa intsha ngomculo
UGUBHA inyanga yentsha ngokuyifundisa umculo uDJ Kabila oseneminyaka eyibambile emculweni.
UDJ Kabila uhlele ingqungquthela ebizwa ngeMusic Will Save The Day Music Workshop ezoba seWinston Churchill Theatre, eMgungundlovu. Izoba ngoLwesihlanu ngo-9 ekuseni kanti kungenwa mahhala.
Uthe lokhu ukwenza ngokubambisana noMnyango wezobuCiko namaSiko esifundazweni ukufukula intsha ukuze yazi kabanzi ngemboni yomculo.
“Minyaka yonke ngihlale ngithola izicelo kubaculi abasafufusa bethi angibasize ngokuhlela imicimbi abanye befuna usizo ngokufaka umculo wabo emsakazweni. Kahle hle bafisa ukuba lapho ngikhona ngokushiyelana inkundla nabaculi abadumile,” kusho uKabila.
UKabila, osebenze kakhulu noCuloe de Song noBlack Coffee, uthe abantu bafuna usizo kuye nje yingoba unomcimbi obizwa ngeMusic Will Save The Day oba minyaka yonke eMgungundlovu.
Uthe uthathe isinqumo sokuwunweba ngokufaka ingqungquthela yokucobelelana ngolwazi kwezomculo.
“Kuzophenduleka yonke imibuzo abantu abanayo. Ngiyazi ngale ndlela ngizohlomisa abaculi abasafufusa ngolwazi ukuze bafinyelele phezulu kwezomculo ngibafundise nangebhizinisi,” kuchaza uKabila.
Uthe bazobe begxile ekuzikhangiseni, ukusabalalisa umculo, indlela yokuziphatha nokunye.
NgoMgqibelo uzoba nomcimbi wakhe obizwa ngeMusic Will Save The Day Experience e-033 Lifestyle khona eMgungundlovu.
Kuzobe kuboshelwe uCuloe De Song, Ralf Gum, Claude, Sir LSG, King Sfiso, Brewed Souls, Deeper Life, T-Munny, DJ Bubbles, Mzwakhe nabanye. Kuzongenwa ngo-R70 ngaphambi kuka-6 kuthi ngemuva kwalokho kube ngu-R100. I-VIP izoba ngu-R150.