Sengathi ungasabalala umbono wabafundi baseLittle Flower
KUKHATHAZA cishe wonke umuntu ukubheduka kokuthunjwa, ukuhlukunyezwa, ukudlwengulwa nokubulawa kwezingane nabesifazane.
Sekube khona imikhankaso ehlukene eqwashisa nelwa nalo mkhuba omubi futhi osuwenze abantu bangakhululeki.
Eminye yale mikhankaso ngowabafundi baseLittle Flower High, eXopo obizwa ngeWomen Wednesday, lapho laba bafundi beqwashisa khona baphinde baqoqe nemali.
Bathi ngenxa yokungakhululeki kwabafundi asebesaba ukwenzakaliswa, abanye abasakwazi ukuya emakilasini engeziwe nayisipesheli njengoba eba ntambama, kwazise abanye bahamba amabanga amade uma sebegoduka.
Ngomkhankaso weWomen Wednesday kudayiswa izikibha ezinemiyalezo eqwashisayo ebese imali abayenzile isetshenziselwe ukuqasha izimoto ezizogodukisa abafundi abayingxenye yamakilasi engeziwe.
Sibashayela ihlombe abafundi baseLittle Flower ngalo mkhankaso wabo oshaya izinyoni ezimbili ngetshe elilodwa.
Yize kukhathazeke isizwe ngokunyamalala nokubulawa kwabantu kepha akuwona wonke umuntu onesibindi, intshisekelo namandla okusungula noma ukuba yingxenye yemikhankaso eza nomehluko empilweni yabantu.
Izikole ezinamakilasi engeziwe ekuseni ngaphambi kokuqala kwesikole, ntambama nangempelasonto, ziba nemiphumela ekhombisayo ukuthi sikhona isidingo sawo.
Yingakho silincoma kakhulu igxathu elithathwe yilaba bafundi abakwaze ukuqhamuka nesisombululo esimeni esishayisa ngovalo.
Sengathi singabaxhasa sonke ngokuthenga lezi zikibha yikhona isikhwama abasisungulile sizokwazi ukuba nemali eyenele yokumelana nezindleko zokusiza abanye abafundi.
Sengathi lo mbono waseLittle Flower ungangaphelela khona kodwa usabalale nezwe yikhona kuyosizakala abafundi abaswele, bangavaleleki ngaphandle ngenxa yokungabi namali nazinsiza.
Nime njalo bafundi baseLittle Flower, niyisibonelo esihle.