Ak’siyimi ile Gqom’...
EMINYAKENI cishe emihlanu edlule indima yomculo kuleli isibhekane nezinguquko eziningi, okuyinto ejwayelekile kwazise abantu bahlezi befuna ukwenza into ehlukile kunabanye. Ngeminyaka yama-1990’s kuleli kwakudlisa ikwaito, kuthakaselwa umculo woBoom Shaka, Arthur Mafokate, Trompies, Mdu Masilela, TKZee, Mandoza nabanye.
Ngokuhamba kwesikhathi, ngeminyaka yama-2000 kungenise i-house, nomsindo wekwaito uqale ukushintsha ngesikhathi kungena amaciko afana noMapaputsi, Brickz, Mzekezeke, Mshoza, Msawawa noBrown Dash. Laba baculi yibo abokugcina abakhiqiza umculo wekwaito oshaya ngesigqi esihamba kancane, iTkzee eyazakhela udumo ngaso. Ngokuhamba kwesikhathi kube nezikhalo zokuthi ikwaito isifile kwazise akekho umculi okwaze ukubuyisa isigqi sekwaito yakudala.
Lokhu kwavula ithuba lokuthi kuqhamuke abanye abaculi abazoyivusa kabusha ikwaito, nokuyinto eyenzekile kuqhamuka uL’vovo ephrojuswa wuZakes Bantwini, neBig NUZ. La maciko ayiguqula indlela ikwaito ebiyaziwa ngayo njengoba abantu babezibuza beziphendula ukuthi hlobo luni lwekwaito lolu. Ngokuhamba kwesikhathi umculo wabo ugcine waziwa ngeDurban Kwaito Music. Eminyakeni emihlanu edlule iDurban Kwaito Music iphinde yaguquka ngendlela ebingalindelekile kuqhamuka uhlobo lomculo olubizwa ngeGqom’. Lolu hlobo luqale ukuzwakala ematekisini ahamba enkabeni yeTheku. Ngemva kodumo lomculi weWest Ink, uBabes Wodumo, iGqom’ ikhule kakhulu kwazise bese izwakala nasemsakazweni. Njengamanje kubaculi abaziwayo ngalolu hlobo lomculo kubalwa yena uBabes, Busiswa, Destruction Boyz, Rudeboyz, DJ Twitty, DJ Lag, Sho Madjozi, Okmalumkoolkat nophrojusa ohlonishwayo uDJ Cleo.
IMenenja yeKwaZuluNatal Music Industry Association, uThando Nyameni, ithe sekunesikhati ilandela lolu hlobo olusha lomculo. “Eminyakeni cishe emithathu edlule, ngaphambi kokuthi udume lo mculo sike sezwa kuthiwa kunabantu baseCape Town asebecela ophrojusa baseThekwini beGqom’ abasafufusa ukuthi babathumelele umculo wabo. Ngemuva kokulandelela sitholile ukuthi lo mculo bebewubhalisa bewuthumelele abantu bamazwe aphesheya kwazise ubusungenisile khona. Bengikhathazekile ngokuthi sekuphelile njalo ngekwaito, kodwa ngithe uma ngizwa lo mculo ngezwa ukuthi amaciko aseThekwini asenze into entsha engavala isikhala sayo.”
Uthe lo mculo usungenisile emazweni aseEurope, ikakhulu eNorway. Lokhu kungafakazelwa nawukuthi ophrojusa beGqom’ kuleli bamatasa emazweni aphesheya nonyaka. Kulabo kubalwa uDJ Lag obephusha umculo weGqom’ e-United States (ehambisana noDJ Twitty), Portugal, Austria, Switzerland, Serbia, nase-U.K ngoMeyi.
Engxoxweni neSolezwe uthe sekuyisikhathi sokuthi luhlonishwe lolu hlobo lomculo. “IGqom’ kade baqala ukuyithanda abantu kodwa bebengayidllali njalo. Inhloso yokwenza lo mculo bekuwukuthi ungenise endimeni yomculo. Njengamanje ngibona sekuyisikhathi esihle sokuthi iGqom’ ibe wuhlobo lomculo ozimele, ubhaliswe nezinye izinhlobo zomculo ezikhona kuleli.”
Ngawo uMeyi, iqembu iRudeboyz laseThekwini nalo beliseNew York, e-US liyingxenye yeRed Bull Music Academy Festival. Leli qembu linconywe ngelinye lamaphephandaba iNew York Times. Kuleli sonto beliqopha isiqephu esizovela esiteshini sezindaba, i-Al Jazeera.
Engxoxweni neSolezwe ilungu laleli qembu, u-Andile Tee (22) uthe baqale ukwenza lolu hlobo lomculo ngo-2012 benomngani wakhe uMassiveQ (25). Uthe bakujabulele ukuthi lo mculo ubathathe wababeka phesheya. “Sizakhele thina umculo weGqom’ ngokuthatha izinsimbi ezivame ukusetshenziswa kwiTribal House, senza omunye umculo ngendlela yethu. Sijabule kakhulu ukuthi abantu bawamukele kahle futhi sithemba ukuthi bazoqhubeka bawuthande.”
UBabes uqokwe kumaBET Awards azoba ngoMgqibelo eLos Angeles, usethubeni lokunqoba indondo yeBest Internationa Act: Africa.