Bahlose ukwakha ubumbano ngedili lomculo
BATHEMBISA ukujabulisa abantu baphinde bavundulule namakhono kubaculi abasafufusa abahleli bomcimbi i-We Are One Festival ozoba KwaMashu, eThekwini ngempelasonto.
Lo mcimbi okungokwesibili wenziwa uzoqala ngoMgqibelo uphothulwe ngeSonto.
Okhulumela abahleli bomcimbi, uNksz Sibahle Luthuli esitatimendeni asithumele uthe kulindeleke ukuthi kube yidili likaMkhipheni elizoshiya abantu becela impinda.
Uthe bahlose ukudala ubumbano emphakathini bafundise nangezinto ezehlukene.
Lo mcimbi ozohanjelwa yiMeya yeTheku uNkk Zandile Gumede noNgqongqoshe ehhovisi likamengameli uMnuz Jeff Radebe, uzoqala Kwamashu eBridge City ngoMgqibelo ekuseni.
Ngalolo suku kuyobe kugquguzelwa ezemidlalo nokuzivocavoca kubantu njengoba kuzodlalwa ibhola lomnqakiswano neminye ehlukene.
Lo mcimbi uzophinde usetshenziswe ukuhlanganisa izinhlanga ezehlukene ikakhulukazi zaKwaMashu nasePhoenix ukuze zihlale ngokuzwana, njengoba kuzodlalwa iVivian Reddy Cup lapho kuzogadulisana khona iqembu lasePhoenix nelaKwaMashu. Umcimbi uxhaswe ngusomabhizinisi uMnuz Vivian Reddy. UNksz Luthuli uthe usuku luyobe selugoqwa ngedili lomculo lapho kuyobe kushiyelana inkundla abaculi bendawo. NgeSonto kuyobe kusaqhubeka idili lomculo ezinkundleni zemidlalo KwaMashu, eBridge City. Kungenwa ngo-R50 kulabo abazobe befuna ukuzozitika ngaleli dili.
UNksz Luthuli uthe umcimbi ngeke ugcine ngokujabulisa abantu ngomculo uzophinde ubambe iqhaza ekufukuleni amabhizinisi amancane ngenhloso yokwenza ngcono impilo yabantu kwezomnotho njengoba kuhlasele ubuphofu nesimo somnotho sibheda.
Osomabhisinisi abasafufusa bazothola ithuba lokukhombisa ngemisebenzi yabo namaciko asafufusa azokhombisa ngethalente lawo.