Lubhuntshile uhambo lukaBabes?
BAHLULEKE sebezama ngisho uMnyango weziNdaba zangaPhandle kaNgqongqoshe uNkk Maite Nkoana-Mashabane uBabes Wodumo nemenenja yakhe uMampitsha emzameni yabo yokuthola izimvume zokuya e-USA.
Bekumele bafulathele elakuleli izolo beya emcimbini wamaBET Awards azoba seLos Angeles NgeSonto uBabes abemenywe kuwo.
Ngemuva kokubona ukuthi bangase bangahambi ngenxa yokungabi nazo izincwadi zemvume zokuthi bangene e-USA babe sebenxusa uMasipala weTheku ukuthi ubasize ngokubaxhumanisa noMnyango weziNdaba zangaPhandle.
Izolo Isolezwe lixhumane nokhulumela uMnyango, uClayson Monyela, othe bathole incwadi ephuma kumasipala ngodaba lukaBabes noMampitsha kodwa abakwazanga ukusiza ngoba isikhathi bese sihambile.
“Esicelweni esifike kithina bekudingeka izincwadi (visa) ezimbili ekaBabes noMampintsha. Kodwa sasidlulisa isicelo ngoba thina besingeke senze lutho. Konke kusezandleni zamahhovisi abhekelele izindaba zase-Melika, okuyibo abazokhipha isinqumo,” kusho uClayson.
Uthe bona babhale incwadi ebicacisa ukuthi bayabazi futhi nohulumeni uyabanika imvume yokuhambela umcimbi.
“Bebekubeka kucace encwadini esiyitholile ukuthi bafisa kangakanani ukuthola izimvume futhi bazidinga ngokushesha.”
Imizamo yokuxhumana noBabes noMampintsha izolo kutholakale ukuthi ngabe bagcine bezitholile yini izincwadi ibhuntshile ngoba izingcingo bebengazibambi. Nomyalezo uMampintsha awuthunyelelwe, ugcine engawuphendulanga.
Isolezwe lithole ngomthombo walo ukuthi uMampintsha yena ubecabanga ukuthi njengoba enePassport akukho okunye okudingekayo.
“Angazi noma izinto zabo zigcine zilungile yini. Ubengasithinta uMampintsha asibuze ngezinto ezifana nalezi kodwa akangazixaka. Uma sesimbuza manje uthi umazisi wakhe nePassport ubecabanga ukuthi kuzomngenisa e-USA,” kuchaza umthombo.
Elayizolo lishone bengakahambi.