Imicimbi ehambisana neVDJ eMax’s Lifestyle
INDAWO yobumnandi eseMlaza, iMax’s Lifestyle ephethwe uMax Mqadi, izogubha iminyaka eyishumi yaba yindawo yokuqala yokuba nemicimbi ehambisana neVodacom Durban July.
NgoLwesihlanu kwaMax kuzoba nomcimbi wokwamukela izihambi nosaziwayo abazobe bekwiVodacom Durban July ngoMgqibelo, eGreyville Racecourse, eThekwini.
NgeSonto kuzoba nowokuvala okuzobe kuboshelwe abaculi abanedumela.
UMax uthe injongo yale micimbi emibili wukugubha impumelelo yokuba yingxenye yemicimbi ehambisana neDurban July.
“Le ndawo kwaba ngeyokuqala elokishini ukuba nomcimbi ohambisana nowamahhashi omkhulu kangaka. Umcimbi wamahhashi wawuphelela edolobheni kuqala kodwa wagcina ufikile nakithina njengendawo yobumnandi,” kusho uMax.
“Sibonga abantu ababa nathi zisuka kuze kube yimanje. Akukho esibona singababonga ngakho ngaphandle kokugubha nabo ngedili lemicimbi esizoba nayo iqala impelasonto ize iphele.”Uthe kulezi zinsuku abantu bazotitiliza imiklomelo eyehlukene njengoba abaxhasi babo, okuyiStandard Bank, benezephulelo kwabazosebenzisa amakhadi abo.
“Kubantu abazongena esangweni basebenzise amakhadi aleli bhange uma bethenga amathikithi noma bethenga inyama. Bazothola isaphulelo sika-R100. Nesitolo sezimpahla zasendlini sakwaHirsch sizophisana ngezimpahla ezehlukene,” kuchaza uMax.
Emcimbini ongoLwesihlanu kuzoba khona abaculi abafana no-Okmalumkoolkat, WTF, DJ Fresh, Ruff Gum, Fistaz Mixwell kanti ngeSonto kuzoba khona uCasper Nyovest, KO, DJ Tira noSomizi.