Bamashele udokotela oshaya iziguli azithuke
UMPHAKATHI waSosindisweni, eNdwedwe, umashele umphathi wesibhedlela sakule ndawo, ukhala ngodokotela okuthiwa ushaya iziguli abuye azichaphe ngezinhlamba, izolo.
Lo mphakathi ubufuna umphathi ukuthi aphendule ukuthi lo dokotela obemiselwe izinsolo zokushaya esinye isiguli ngoJanuwari, ubuye kanjani.
Lo dokotela kuthiwa kunenqwaba yeziguli esezifake izikhalo ngaye kubaphathi kodwa ubonakale kuleli sonto esesemsebenzini. Uma kubuzwa kumphathi wesibhedlela, ukuthi ubuye kanjani wathi akazi. Owesifazane igama lakhe elingeke lidalulwe uthe washaywa yilo dokotela ngoJanuwari, uthe wayeze esibhedlela ezolanda imishanguzo yokuthithibalisa igciwane lengculazi, kwase kutholakala ukuthi umfutho wegazi lakhe uphezulu, kwathiwa akaye kulo dokotela.
“Ngangena udokotela exabana nomunye wesifazane bebanga ukuthi ufunani kulesi sibhedlela ebe engowasoThongathi, wagcina esembiza ngeKhafula. Wathatha ifayela lami wathi nhla, wabona ikhadi elimhlophe wathi yena akahlangani neziguli ezinegciwane lengculazi.
“Ngamtshela ukuthi kuthiwe akangihlole ngoba umfutho wegazi uphezulu. Wathula, maqede wabiza esinye isiguli, wabiza esesibili nesesithathu ngilokhu ngimi kanjalo.
“Eseqedile naso ngambuza ukuthi mina uthi angenzenjani, wathatha ifayela wangishaya ngalo ekhaleni ngopha, ngalaliswa kuso lesi sibhedlela,” kusho yena.
Uthe lolu daba walubika kubaphathi wavula necala lokushaywa emaphoyiseni. Uthe kwaba nesigcawu sokulalelwa kwezinhlaka zombili, udokotela waphika ukuthi washaya. Wathi akasakhumbuli ukuthi efayeleni lakhe kwakubhalweni kunalokho wathi lo wesifazane nguyena owamthuka kodwa wehluleka ukhomba ofakazi.
Esegula ngokulandelayo uthe waya komunye udokotela owambuza ukuthi uyena yini owaxabana nodokotela, wavuma.
“Wathi ngeke akwazi ukungisiza, ngaze ngasizwa ngomunye udokotela. Lo dokotela wathi angikhululeke uma bengangisizi abanye odokotela angoza kuye, kodwa sengiyesaba ngoba izolo (esho ngoLwesithathu) ngifike esekhona. Uma ngibuza umphathi wesibhedlela uthe naye akazi,” kusho yena.
UMnuz Mondli Ngcobo, wabebehola imashi uthe, ngaphandle kwalo dokotela kuningi okungenelisi ngalesi sibhedlela, njengokuthi nje iziguli zike ziyoziphakela ekhishini abasebenza khona bethi, bakhathele.
Uqhube wathi kuhlanganiswa iziguli emawodini. Uthe iziguli esinesifo sofuba neziphazamiseke engqondweni zilaliswa ndawonye.
“Lolu daba sesike salukhuluma nomphathi wesibhedlela, wasishaya indiva. Nyakenye sibe nemashi enjengayo le, asiphendulwanga,” kusho yena.
UMnuz Sphiwe Yosi obephuma ehhovisi leNhloko yoMnyango wezeMpilo KwaZulu-Natal, uthe izikhalo zomphakathi zizodluliselwa kuyo inhloko yomnyango.