Imeya ikhale ngosikhwili phambana
IMEYA yoMkhandlu weTheku, uNkk Zandile Gumede ikhale ngosikhwili phambana nobhoko kumasipala abaholele ekutheni kube nomsindo mayelana nokuhoxiswa kwengqungquthela yokubuyisana.
Ekhuluma ngesikhathi evula ngokusemthethweni ingqungquthela yemigomo yesifunda seTheku izolo, imeya, ephinde ibe nguSihlalo we-ANC kulesi sifunda, ithe isizathu esidale ukuthi kuhlehliswe ingqungquthela wukuthi bebefuna ukufaka iziphakamiso ezenziwe engqungqutheleni yokubuyisana yesifundazwe eyaba KwaMashu.
“Isinqumo sokuhoxisa ingqungquthela kukhulunywe ngaso ngoLwesine olwedlule kodwa osikhwili phambana nobhoko benza okwabo, siwumkhandlu besingeke siqhubeke nengqungquthela sithathe izinqumo zethu sishiye iziphakamiso zesifundazwe,” kusho uNkk Gumede.
Uthe okubikwa ngakho emaphepheni bayakulungisa.
“Imenenja yomkhandlu uMnuz Sipho Nzuza inenyanga eyodwa iqalile ukusebenza kodwa engingakusho wukuthi lolu daba ilusukumele phezulu,” kusho yena.
Ukuhoxiswa kwengqungquthela kukubeke obala ukungezwani phakathi kukaNkk Gumede neNhloko oPhikweni lwamaPaki nezokuNgcebeleka emkhandlwini, uMnuz Thembinkosi Ngcobo.
Okuphinde kwashubisa ingxabano kakhulu, ukuphawula kukaNgcobo lapho egxeke khona uMnuz Mthunzi Gumede okhulumela imeya wathi uziphathisa okwenkabi ngendlela aphawule ngayo odabeni oluthinta igama lakhe.
UNkk Gumede uxwayise amalungu e-ANC wathi akumele avumele umuntu ahlukanise umbutho phakathi.
Uthe uma iTheku lihlukene phakathi kusho ukuthi iNingizimu Afrika yonke ihlukene phakathi.
“Ingakho wonke upopayi uma efuna ukudansa eza eThekwini, nalowo ofuna ukudunga inhlangano uza khona,” kusho uNkk Gumede.
Uthe njengoba kuyiwa engqungqutheleni yemigomo kazwelonke bafuna icaciswe indaba yomhlaba, eyebhange lombuso no-30% wezimayini okumele unikezwe abamnyama.
UNkk Gumede uthe i-ANC inemigomo emihle kodwa inkinga isekuthatheni izinqumo.
“Sifuna njengoba kuyiwa engqungqutheleni yemigomo kuzwelonke kucace futhi ukuthi yiziphi izinyathelo ezizothathwa uma imigomo ephakanyiswayo ingasalandelwa. Kunezinqumo eziningi ezinhle ezithathwe ePolokwane saphinde saziphakamisa naseMangaung kodwa kuze kube yimanje akukho okwenziwe,” kusho imeya.