Kufe abathathu itekisi lingena emzini womuntu
KUSHONE abantu abathathu, kwalimala abayisithupha, eMzinyathi, eNanda, ngesikhathi itekisi liphaphalaza liphonseka emzini womuntu izolo.
UMnuz Chris Botha wakwaNetcare 911 uthe ngesikhathi befika endaweni yesehlakalo bafice abagibeli belele otshanini egcekeni lomuzi. Ezinye izingcezu zetekisi namasondo bekusakazeke egcekeni, amafasitela efahlazekile.
“Ngesikhathi sihlola, sithole ukuthi abantu abathathu bese beshonile, abayisithupha belimele kanzima,” kusho uBotha.
Kwesinye isehlakalo kushone abantu ababili engozini yeveni egingqike kuphunywa emngcwabeni eWeenen ngaphandle kwaseGreytown izolo.
Kuthiwa iveni ibisuka eMuden iqashiwe iya eWeenen emngcwabeni kodwa ayibange isafika khona.
Evenini bekukhona abantu abangu-15, abayisishiyagalombili balimale kanzima.
Izolo bekungakacaci ukuthi abashonile bahlobene kanjani nobeyongcwatshwa.
Okhulumela amaphoyisa KwaZulu-Natal, u-Lt Colonel Thulani Zwane uthe kuvulwe amacala amabili okubulala ngokungenhloso.