I-KZN iphumela obala ngoDlamini Zuma
IKWAZULU-NATAL seyiphumele obala ngokweseka uDkt Nkosazana Dlamini Zuma ukuthi kube nguyena umengameli we-ANC olandelayo njengoba kuyiwa engqungqutheleni yokukhetha ubuholi obusha ngoDisemba.
Engqungqutheleni yemigomo yesifunda iTheku izolo, uNksz Nontembeko Boyce oyilungu lesigungu se-ANC KwaZulu-Natal obeyisithunywa kule ngqungquthela, uthe iKZN inqume ukuphumela obala ngokweseka uDlamini Zuma.
“Njengoba abantu sebeqalile ukukhuluma ngaye nakwezinye izindawo, sibona lokhu kungalimaza umkhankaso wakhe yingakho sithi asisho ukuthi siyameseka ukuthi abe ngumengameli we-ANC, olandelayo,” kusho uNksz Boyce.
“Okwethu njengesifundazwe wukuthi siye emagatsheni siyodayisa igama lakhe,” usho kanje.
I-ANC esifundazweni, izokuba nengqungquthela yemigomo lapho kulindeleke ukuthi imgcobe ngokusemthethweni uDkt Dlamini Zuma kule mpelasonto.
Ukuphumela obala kweKZN bekuvele kulindelekile ngemuva kokuthi i-ANCYL eThekwini imemezele ukuthi baphakamisa igama lakhe. Nesifunda iTheku, okuyisifunda esikhulu kunazo zonke ze-ANC eNingizimu Afrika, samemezela ukuthi sifuna ukuholwa nguyena. Yize i-ANC eKZN beyingakaphumeli obala kodwa uSihlalo wayo uMnuz Sihle Zikalala emicimbini ubelokhu emkhankasela uDkt Dlamini Zuma.
USihlalo we-ANCWL eThekwini, uNksz Lindiwe Mthembu, uhambe emazwini kaNksz Boyce wathi iTheku lihamba noDlamini Zuma. UDkt Dlamini Zuma ubanga lesi sikhundla nePhini likaMengameli, uMnuz Cyril Ramaphosa. Bakhona nabanye abaholi amagama abo avelayo, okubalwa uNkk Lindiwe Sisulu, Mnuz Mathews Phosa noMnuz Jeff Radebe.
UDlamini Zuma wesekwa i-ANCWL, MKMVA ne-ANCYL. URamaphosa wesekwa yiCosatu, SACP neSanco.