Sihlawuliswe ingxenye yomholo isikhulu se-ANC
IPHALAMENDE lihlawulise ilungu le-ANC ePhalamende, uMnuz Pule Mabe ngenhlawulo yokuthi uzobanjelwa imali yezinsuku ezingu 15 emholweni ngokwephula imigomo yokuziphatha kwamaLungu ePhalamende.
Lokhu kuza ngemuva kokuthi i-Joint Committee on Ethics and Members’ Interests yenze uphenyo ngoMabe yathola ukuthi wephula umthetho wokuziphatha.
Isimangalo sifakwe ngemuva kokuphuma kombiko kaMvikeli woMphakathi mayelana nezinsolo zenkohlakalo kwaPassenger Rail Agency of South Africa (Prasa).
Kusolwa ukuthi inkampani kaMabe i-KG Media, yanikwa ithenda ngendlela engafanele kwaPrasa ukuze ishicilele ibhuku, iHambanathi nokuthi inkontileka ibilulwa ngendlela engekho emthethweni.
UMabe owake waba yisikhulu kwaPrasa usolwa ngokukhokhelwa umholo kungafanele ngemuva kokwesula kwakhe kule nkampani ngo-2008/2009. Umgomo wokuziphatha kwamalungu ePhalamende awuvumi ukuthi amalungu abe nezinkampani zamathenda.
Ngokombiko wokugcina woSihlalo beJoint Committee, uMnuz Amos Masondo noMnuz Omie Singh, uMabe unamasheya kwaKedibone Trust enamasheya angu-100% kwaKG Media.