Uvele enkantolo ‘owadlwengula’
UZOCELA ibheyili ngenyanga ezayo umshayeli wetekisi osolwa ngokudlwengula indodakazi angayizali eneminyaka engu-12 eLindelani.
Umsolwa (40), ongeke adalulwe ukuvikela umgilwa, ubengatshengisi kwethuka ngesikhathi engena enkantolo yeMantshi eNtuzuma ebigcwele amalungu omphakathi abephume ngobuningi ezokweseka unina wentombazane. Kuke kwaba nesikhathi lapho ebezihlekela khona ngesikhathi ebhunga okuthile nommeli wakhe. Ukuvela kwakhe kuthathe isikhathi esingaphansi kwemizuzu emihlanu. Umshushisi kuleli cala, uMnuz Stan Miloszewski, akachithanga sikhathi waveza ukuthi inkantolo izosichitha isicelo sebheyili sikammangalelwa.
“Leli cala lisemacaleni abucayi kakhulu. Lithukuthelise umphakathi ngakho isicelo sebheyili sizosichitha,” kusho uMiloszewski.
Inkantolo ikuhlehlisele uJulayi 3 ukulalelwa kwesicelo sebheyili.
Amalungu omphakathi, akhulume ngemuva kwesinqumo senkantolo, aveze ukuthi afuna inkantolo ingamdedeli umsolwa ngebheyili.
“Sizofika ngobuningi bethu ukuzofaka ingcindezi yokuthi anganikezwa ibheyili. Izenzo zokuhlukunyezwa kwezingane nabesimame ngeke sizibekezelele emphakathini wethu,” kusho ilungu lomphakathi elingathandanga ukudalulwa.
Umsolwa kuthiwa ubanjwe oqotsheni ngamalungu omphakathi edlwengula indodakazi yentombi yakhe angayizali ngoMsombuluko ebusuku. Omakhelwane babone itekisi ayishayelayo ime eduze kwendlu yentombi yakhe kanti bebenolwazi lokuthi umnikazi wendlu usebenza ebusuku base benikela kule ndlu ngaphambi kokuba bafonele amaphoyisa.
Unina wentombazane obehambisana namalungu omphakathi ubethule kungavumi nokuthi akhulume. Umholi womphakathi obhekelele izindaba ezithinta abesifazane, uNksz Nonhlanhla Shezi, uthe umgilwa nonina basathukile badinga ukwelulekwa ngokwengqondo ukuze bakudlulise ukuhlukumezeka kwabo.