Liphinde lahlehla elowengane ‘eyebiwa’
LIHLEHLISELWE uJulayi 28 nonyaka icala likanina wengane enenyanga okwakuthiwa intshontshiwe.
Unina wengane ongeke adalulwe ngenxa yokuthi icala lithinta yona, uvele izolo enkantolo yeMantshi eThekwini.
Uvele nomsolwa wesibili okuthiwa yisoka lakhe, okunezinsolo zokuthi linguyise wengane wangempela, owayeyithathile njengoba kwase kuthiwa yebiwe.
Unina wengane obezifihle ubuso, ubehleli ngokuhlukana nomsolwa wesibili ebhokisini.
Imantshi ngesikhathi ihlehlisa icala ikhiphe umyalelo wokuthi selihlehliswa okokugcina.
UNkk Natasha RamkissonKara, we-NPA, KwaZuluNatal uthe bayathemba icala lizoqhubeka uma sekuphothulwe uphenyo.
“Icala liphinde lahlehla futhi ngoba amaphoyisa asaqedela ukuqoqa ubufakazi. Siyathemba uma sesibuya enkantolo kuzobe sekuphothulwe konke sikwazi ukuqhubekela phambili,” kusho uNkk NatashaKara.
Ingane kuthiwa isagcinwe ngosonhlalakahle njengoba icala lisesenkantolo.
Umyeni kanina wengane, naye esingeke simdalule, ubekhona enkantolo. Baphume enkantolo behambisana nezinye izihlobo zabo. Osolwa ngokuba uyise wengane uphume ehamba yedwa.
Ingane kwabikwa ukuthi yalahleka ngoMashi nonyaka, emuva kwezinsuku ezimbili yatholwa inowesilisa owathi unguyise wayo okusolwa ukuthi ubethandana ngasese nonina wayo oshade nomunye wesilisa.