Usebenza nabantu abagxile ekulimeni
UNOTHANDO lokushintsha impilo yomphakathi osemakhaya umfundi wase-University of KwaZulu-Natal (UKZN) ophinde afundise abanye iMedia and Cultural Studies.
UMzwandile Makhanya (26) waseMlaza ukubafundi abafunde bagogoda kulesi sikhungo enza iPhd kulo mkhakha. Yize egxile nasekuqopheni amafilimu, okuyingxenye yomkhakha wakhe, ubuye acwaninge ngokunakekelwa nokongiwa kokudla, iFood Security. Lokhu kwenza asebenze nemiphakathi elimayo.
“Ngangena e-UKZN ngo-2009 ngenza iBachelor of Social Science ngigxile kwiFood Security. Ngibuye ngenza iMaster’s neHonour’s Degree njengoba sengenza nePhd. Ngithole ukuthi iseyinkinga indaba yokulima ngoba abantu basemakhaya abafundisekile kahle ngakho. Yize kuyibona abalima kakhulu kodwa kunezinto abangazazi njengoba betshala emhlabathini ongahloliwe,” kusho uMakhanya.
UMakhanya usebenzisa ikhono lokuqopha amafilimu ukuveza izinselelo kwezolimo. Ukholwa wukuthi kuningi okungavezelwa umphakathi ngokudidiyela amafilimu. “Ngiyathanda ukuthola ulwazi ngiludlulisele emphakathini yingakho ngigxile ekwenzeni ucwaningo ngokudla nezolimo,” kusho uMakhanya.
Ngesikhathi enza iMasters usebenze nabalimi besifazane abangu-20 baseWillowfontein, eMgungundlovu. Uthe indlela umsebenzi obe mkhulu ngayo kwagcina kungena neminye imiphakathi kwajoyina nabesilisa. Yize umsebenzi wakhe kuwukwenza ucwaningo uthe akafuni ukushiya zingekho izixazululo zezinselelo zomphakathi. Manje wenza ucwaningo ngodaba lweSimangaliso, eSt Lucia, oselususe umsindo umphakathi ukhala ngokuncishwa amathuba nokudlelwa umhlaba. Uthe usemkhulu umsebenzi okumele wenziwe ukugwema ukushoda kokudla. Ocwaningweni lwakhe uthole nokuthi indlala inomthelela ekufeyileni kwezingane ezikoleni.