Kuyacaca ukuthi uDhlomo uhlulwe wumsebenzi
UMBIKO okhishwe yiSouth African Human Rights Commission oveza ukuthi awahlonishwanga amalungelo eziguli ezinomdlavuza ngesikhathi ingasebenzi imishini yokwelapha lesi sifo, yichilo.
Empeleni uma kubhekwa izinto ezishiwo nguNgqongqoshe wezeMpilo kuzwelonke, uDkt Aaron Motsoaledi, ogxeke indlela uMnyango wezeMpilo KwaZulu-Natal okhipha ngayo amathenda kubantu abahlinzeka ngezidingo nathe seziwise lo mnyango kufanele ngabe uNgqongqoshe, uDkt Sibongiseni Dhlomo, usesulile ngoba kusho ukuthi izinto zibhede ngaphansi kweso lakhe.
UMotsoaledi uthe akuyona inkinga yodokotela abalapha umdlavuza lena, kodwa wukuthi iKwaZulu-Natal isebenzisa izindlela ezingalungile zokukhipha amathenda.
Uqhube wathi ukungasebenzi kwemishini yase-Addington kusho ukuthi umthamo weziguli obekufanele zisizakale khona uthwalwe yiNkosi Albert Luthuli nobekusho ukuyigqilaza nayo.
Sekunesikhathi kukhalwa ngokungasebenzi kwemishini yokwelapha umdlavuza e-Addington, into okwakumele isukunyelwe ngokushesha uma kubhekwa indlela lesi sifo esibucayi ngayo nanokwanda kwabantu asebenaso ezweni.
Siyakuqonda ukuthi mkhulu futhi mningi umsebenzi owenziwa nguMnyango wezeMpilo zinsuku zonke ukwelapha abantu futhi ziningi izingqinamba obhekene nazo.
Kodwa yize kunjalo, kukhona izinto ezingagwemeka, ukufa kwemishini isikhathi eside ngenye yazo. Akufanele ngabe kudonse lesi sikhathi okusidonsile ukube abantu bayawuhlonipha umsebenzi wabo.
Ngale nje kokubhekana nomnyombo wale nkinga kodwa kukhona nokufanele baphelelwe ngumsebenzi futhi umuntu wokuqala okufanele akhombise ukuthi uyazisola ngokwenzekile nguDhlomo ngoba vele yena ngeke aqondiswe ubugwegwe njengoba ejutshwe yi-ANC.
I-ANC inhlangano ezigqaja ngokubhekelela abahlwempu, uma engazisuleli uDhlomo kusho ukuthi uNdunankulu Willies Mchunu nguyena okufanele akhombise ubuholi ngokuthi amsuse.
Yiningi kakhulu imali okuhlinzekwa ngayo uMnyango wezeMpilo, kufanele kubonakale ukuthi yenzani.