Abalandeli beBucs banxanele ushintsho bafuna ukujabula
KUTHIWA ukujabula kuyashintshana. Yize sikwazi lokho, isifiso sethu esokuthi lokho kushintshana kuze ngendlela ehlelekile engamlimazi emoyeni loyo engaqondile kuye leyo njabulo.
Uma ngibuka izinkumbi zabalandeli be-Orlando Pirates ngiye ngibe nomuzwa wokuthi banaso leso sifiso sokuthi iphele indlala, injabulo ike ivakashe nakubo. Lo muzwa usuka kulokhu abakubonile abalandeli kule sizini okwakuhlelwe ukuthi kube nesiphihli sedili lenjabulo kuyo – nakhu phela iqembu ligubha iminyaka engu-80 lasungulwa. Baningi abalandeli bePirates abebefisa ukuthi injabulo yabo ifinyelele eduze kwale ababekuyo ngesikhathi begubha iminyaka engu-75.
Kulowo nyaka isicoco seligi salekwa ngezinye izicoco kwajatshulwa kwanjeyaya e-Orlando. Kule sizini akubanga nje indlala yezicoco nebhola elinganambithisiseki okuphoxe abalandeli kodwa babe nokuzibuza beziphendula ngohlobo lwabadlali abanalo nokuzinikela kwabo.
Ezinye izinkakha ezake zadlubha imibala yaleli qembu zize zathi leli butho lePirates abanalo njengamanje lingompetha bomhlaba kuphela nxa kukhulunywa ngezithombe abazishutha zona bese bezinameka ezinkundleni zokuxhumana ezifana no-Instagram. Yindlela leyo ekubeka ngokusobala ukuba muncu kwesimo nomuzwa emndenini waMabhakaniya.
Nokho-ke ngenhlanhla yalo leli qoqo labadlali nabaqeqeshi bePirates abakhona njengamanje isekhona into enhle abangayisebenzisa ukuthoba izinhliziyo zabalandeli. Leyo nto iyobenza nabo bakhunjulwe njengabanye abake baletha injabulo – nokwenza begubha iminyaka ecela kwinkulungwane iqembu laqala ukutshakadula.
Nokho-ke inkinga ebhekene nabadlali beBucs yile ntaba ethi mayifane neKilimanjaro okufanele bayiqwale ukuze balethe umthobanhliziyo kubalandeli babo. Leyo Kilimanjaro emi phambi kwabadlali beBucs isilwane esibizwa ngeSuperSport United, okungelinye lamaqembu asePitoli ayihlazile kulo nyaka obekumele kube owenjabulo yodwa e-Orlando. Yithuba elihle futhi leli kubadlali beBucs nomqeqeshi wabo uKjell Jonevret ukuthi bakhombise ukuthi kungalindelwa ibhola elinjani kubo nxa sekubuyelwa ensimini ngesizini ka 2017/2018 ezoqala ngo-Agasti. Okubi wukuthi nxa bengaphinde bashaye udaka baningi, mhlawumbe nasebhentshini abayoyizwa kwenye indawo isizini ezayo.
Uma kunjalo kubukeka kukuningi okumele kugqugquzele abadlali beBucs ukuthi bafele kuyo iSuperSport uma sebebanga indebe kowamanqamu weNedbank Cup eThekwini kusasa ebusuku. Yebo neSuperSport inakho okwayo ekufisayo ngale ndebe kodwa nxa ubhekisisa akuqongile njengokweBucs.
Okokuqala nje uma iBucs iwina lo mqhudelwano iyokwazi ukubuyela kwiCaf Confederation Cup ngonyaka ozayo ekanti iSuperSport inethuba lokuthi ibuyele kulo mqhudelwano ngokuthi iwunqobe kulo nyaka njengoba ivele idlala kuwo. Njengoba sekuphele amasizini amathathu abadlali beBucs bagcina ukubamba indebe ngezandla zabo, ukuwina lo mdlalo wakusasa kuyobavulela amathuba amaningi.
Izifiso ke kumele zehlukaniswe eqinisweni. Nxa silikhuluma nje iqiniso singasho ukuthi leli qembu leSuperSport yilo eliyizimfivilithi ngezizathu eziningi. Uma lingehlulwa abanye bangaze basho nje ukuthi lehlulwe ngabomu, mhlawumbe ngoba licabangela abadlali bePirates olakeni abazoluthola luqhamuka zinkalo zonke uma begejwe yile ndebe. Okokuqala nje abadlali beSuperSport bazofika kulo mdlalo bengenayo inkinga yokuthi kade bagcina ukudlala umdlalo oseqophelweni eliphezulu. Bazofika kade beqeda ukushukana neTP Mazembe yaseDRC emdlalweni wamaqoqo weConfederation Cup ePitoli ngoLwesibili.
Njengoba iphelile nje isizini emaqenjini amaningi ePSL kubadlali beSuperSport ayikaze iphele ngenxa yalo mshikashika weConfed Cup. AbePirates abadlali sekuphele inyanga bagcina ukudlala kanti bagcina bethole isibhaxu kuyo le nkundla abazodlala kuyo neSuperSport njengoba iGolden Arrows yabavalelisa ngo 2-1 bagcina bengangenanga nakuTop 8 yePSL. Konke ke nje lokhu yithunzi elimnyama ongalidingi nxa uyobhekana nempi efana nale eseMoses Mabhida Stadium kusasa.
Yize kunjalo okumele kugqugquzele abalandeli bePirates iqiniso lokuthi emdlalweni wamanqamu ubumfivilithi buphela ngaphandle kwenkundla. Okuhle futhi wukuthi kuningi okufanele ukunikeza abadlali beBucs umdlandla wokulwela ukunqoba kulo mdlalo nokuvala imilomo yalabo abathi bahle kuphela nxa bezixhafaza ngamakhamera omakhalekhukhwini babo. Abadlali beBucs ngeke baphinde balithole ithuba elihle ukwedlula leli ukuvala imilomo yalabo asebekhohliwe ukuthi bangobani bona.
Ukunganqobi kweBucs kuyosho ukuqala komshikashika wokuchithwa kwabadlali nokubhekisiswa kwendaba yomqeqeshi abanye abalibeka ngembaba elokuthi nekusasa lakhe lincike kumphumela womdlalo wakusasa yize engakaqedi nezinyanga eziyisithupha ethathe lo msebenzi. Angiboni ke nokho ukuthi kuyobe kunobulungiswa uma uJonevret enqanyulezwa ngomphumela walo mdlalo.
Umsebenzi wakhe uJonevret uyokuba ngolukhuni kakhulu kunakuqala nxa ezophuma eMabhida izinto zingamvunanga. Okokuqala akukho sikhathi esanele anaso sokuhlakaza leli qembu analo alikhande kabusha njengoba ezokuba nesikhathi esingaphansi kwamasonto amane ukulungiselela isizini. Okubukeka kungamsiza lo mqeqeshi ukunqoba lo mdlalo bese ezama ukwakhela phezu kwalo leli qembu elikhona yize kunabalandeli beBucs abakhala ngenqwaba yabadlali abathi kwakungafanele nokuthi baze basondele kwasekuqaleni eduze kwejezi leqembu labo.
Kuningi abadlali beSuperSport abazofuna ukukwenzela iqembu labo ngokunqoba lo mdlalo. Okokuqala bazokuba abokuqala ukunikeza iqembu labo umlando wokuvikela le ndebe isinalaba baxhasi enabo njengamanje.
Okukhulu kunakho konke kodwa ezingqondweni zabadlali beSuperSport kuzokuba ithuba lokuvalelisa kamnandi kumqeqeshi wabo uStuart Baxter ozokube enabo okokugcina njengoba esengumqeqeshi weBafana Bafana.
Okunye okuvuna iSuperSport yikho ukuthi iza kulo mdlalo ihlome ngoBaxter owanqoba lo mqhudelwano eshaya yona iPirates ngonyaka odlule kanti nomqeqeshi amshaya esekuBucs, u-Eric Tinkler, uzomnikeza wonke amaqhinga awadingayo ukushaya izitha zakhe njengoba kunguye ozovala isikhala sakhe kuSuperSport.
Nokho ke njengoba ngike ngasho, ukujabula kuye kube kuhle nxa kushintshana. Abantu abalunxanele kakhulu ushintsho abalandeli beBucs. Okunzima ke kubo wukuthi amandla okwenza lolu shintsho awekho emilenzeni yabo kodwa akubo laba badlali beBucs abangazange benze lutho ukubajabulisa kule sizini eyingqophamlando emlandweni weqembu labo.