Uzokujabulela ukuya ejikeni ngesivinini

IMOTO: LEXUS LC 500

BAKUFANISA nokuvuleka kwekhasi elisha emlandweni wabo kwaLexus ukwethulwa kweLC 500 Coupe entsha.

Okubajabulisa kakhulu abakwaLexus wukuthi ukwakhiwa kwale moto kuqale kuwumcabango kodwa yagcina isiyenzekile, iphethe isitayela ngendlela ebukeka ngayo kanjalo nokuba namandla esambane.

Bathi iyizinkomba zokuthi ikusasa labo lizobanjani.

Le moto kulula ukusheshe uyibone ukuthi yiLexus ngenxa ye-grille yayo ngaphambili. Inama-daytime running lights amise okukaL nama-headlamps anamaLED amathathu.

Ukhakhayi lwayo luya ngokuba yisibaca ngemuva. Inyathela ngamasondo angu-21” Michelin Pilot Super Sport Tyres.

Uyibuka nje uyabona ukuthi yimoto yejubane. Ayiphoxi neze njengoba ishaya ngenjini engu-5 litre eyiV8. Ikhahlela amandla angu-351 kW ne-torque ka-450 Nm.

Bathi kuyithatha imizuzwana engu-4.7 ukufika ejubaneni lika100km/h. Izinqawe zayo ezimbili ngemuva ziyabhonga.

ILexus LC 500 ino-gearbox oyi10 speed automatic transmission. Uma uthanda uzishintshela wena ngama-paddles.

Uyikhetha wena ukuthi ufuna ihambe kanjani ngokuyifaka ku-Eco, Normal, Sport noma uSport S+.

KwaLexus bathi iyabambelela njengoba ineLexus Dynamic Handling System esizayo kulokhu. Ekhoneni umshayeli uyakujabulela ukuya khona ngejubane.

ISuspension yayo bathi yenza umshayeli akhululeke ngaso sonke isikhathi.

Ngakwezokuphepha iphuma nama-curtain airbags kanjalo nawasedolweni nasemaceleni nePre-crash system. Kukhona neBlind Spot Monitor, Lane Keeping Assist nekhamera yangemuva. Kukhona namalambu akhanya bha eLED ne-headsup display ukuze umshayeli engalokhu eqalaza emaceleni. INTENGO R1 729 600 Iphuma ne-service plan yeminyaka emine noma ibanga lika-100 000km, neLexus Distance Plan Complete.