I-Honda Civic isiyehlukile kunale yakudala
UKUSHAYELA iHonda Civic ngicabanga ukuthi ngakugcina eminyakeni ecela kwengu-10 eyedlule ngakho kube yintokozo kimi ukuthola ithuba lokuphinde ngiyishayele.
Njengoba bengilindele, isihluke kakhulu kuneyangalesiya sikhathi ikakhulukazi ngendlela ebukeka ngayo, izinjini, izinto ephuma nazo nokunye.Le moto inhle futhi iyawadonsa amehlo emgwaqeni. “Inswempu le moto malume,” kusho omunye umjita engimfice eyizungeza ngiyipakile.
Omunye usondele kuyo egaraji wabe esememeza uzakwabo ethi yiSport, yingakho inje.
Ngaphambili ishaya ngamaheadlights eLED kanjalo namafog lights. I-grille yayo imnyama emesha nezibambo zokuvula izicabha ezigqize ngechrome. Inyathela ngamasondo anamarimu angu-17 inch. Ngemuva ishaya nge wing phezu kwesivalo sebhuthi yabe isiba namalambu amakhulu kanjalo ne brake light kwi-wing.
Izinqawe zayo ezimbili ngabe kungcono ukube zivele obala bese zithi ukubhonga kancane ukuze kucacele noma wubani ukuthi yiSport uma iduma.
Uma ungena ngaphakathi yilapho ofike ubone khona ukuthi yimoto eseqophelweni eliphezulu. Ivulekile ngaphakathi abagibeli abahlanu bahlala ngokukhululeka ezihlalweni ezintofontofo zesikhumba.
Ezingaphambili ziyafudumala uma kubanda. Okungiphoxile ukuthi, yize inobuchwepheshe obuningi, izihlalo azihanjiswa ngebhathini njengezimoto zesimanje.
Ishaya ngetouch screen engu7 inch. Kuyona ukwazi ukwenza izinto eziningi njengokuxhuma iselula nge-Apple CarPlay, ungena kwi-internet, ubuka izithombe, udlale umculo, iveze ingemuva uma uhlehla nokunye. IneBluetooth, HDMI, USB futhi inezipikha ezigqomayo.
IneDual Zone Aircon. Uma uthanda uyidumisa ngokhiye uzimele ngaphandle futhi asikho isidingo sokulokhu ukhipha ukhiye ephaketheni ngenxa yokuthi uma usondela uyivula iyavuleka futhi uma uhamba iyazikhiya.
Ngaphakathi idunyiswa ngebhathini.
Injini yayo i-Inline 4 Cylinder VTEC TURBO engu-1.5 litre. Ifuqa amandla angu-127 kW netorque engu-220 Nm.
Ukusuka ku-0 iye ku-100 kuyithatha imizuzwana engu8.2 kanti ijubane layo elikhulu ngu-200km/h. Bathi ngebanga lika-100km isebenzisa amalitha angu-5.9 kaphethroli.
Engingakutshela khona wukuthi akusiyona imoto yejubane lokho okuzwa noma ujika ikhona ushesha ukuthi uyenzisa into engakhelwanga ukuyenza. Emgwaqeni ovulekile kodwa iyashesha futhi engikuthandile wukuthi ithule ngaphakathi. Ishaya ngo-gearbox oyiContinuously Variable Transmission (CVT) ongumshini ozishintshayo. Ayi wona ushintsha kamnandi ubuye ungezwa nokuthi sekungena elinye igiya. Uma uthanda uzishintshela wena kuma-paddle shifts ngemuva kwesiteringi. Intengo 1.5T Sport CVT - R430 000 Iphuma ne-service plan yeminyaka emihlanu noma ibanga lika-90 000 km, iwarranty yeminyaka emihlanu noma ibanga lika-200 000km ne-AA Roadside Assist yeminyaka emithathu.