I-Polo yesizukulwane sesithupha
I-VOLKSWAGEN (VW) yethule Polo yesizukulwane sesithupha okuthiwa izotheleka kuleli ekuqaleni konyaka ozayo.
KwaVW bathi iPolo ingenye yezimoto zabo ezidayisa kahle emhlabeni jikelele njengoba zonke izinhlobo zayo sekudayiswe ezingaphezulu kuka-16 million.
Bathi le Polo entsha isazoqhubeka nempumelelo yayo.
Ihluke kakhulu kunendala futhi isithe ukuba nkulu kancane lokhu okunikeza abagibeli nomshayeli isikhala esanele sokuhlala. Kuphinde kwakhula nebhuthi njengoba ukuvuleka kwayo kusuke ku-280 kwafika ku-351 litres.
Nobuchwepheshe bayo bengeziwe kwafakwa nobebutholakala ezimotweni zakwabo iPolo nePassat.
Izophuma ngezinhlobo ezahlukene okuyiTrendline, Comfortline, Highline, eyisipesheli iPolo Beats (enomsindo ongu-300 watt) nePolo GTI enamandla angu-147 kW.
ITrendline iphuma nezinto ezifana namaLED daytime running lights, speed limiter, neFront Assist eneCity Emergency Braking nePedestrian Monitoring.
Enye yezinto ezitholakala kwiPolo entsha yi-adaptive cruise control (ACC) engasebenza ejubaneni elifinyelela ku-210 km/h. Okunye yiBlind Spot Detection, semi-automated Park Assist, Keyless Access nokunye.
Bayigaxe ne-infotainment system yesimanje ene-screen esiphakathi kuka-6.5 kuya ku-8 inch. Ngaphandle ishaya ngemibala emisha ehlukene ka-14 nezinhlobo zamasondo angu-12 aphakathi kuka-14 kuya ku-18 inch.
E-Europe le moto kulindeleke ukuthi yethulwe ngaphambi kokuphela konyaka. Izinjini kukhona ezikaphethroli ezine nezikadizili ezimbili.
Inani leTrendline eGermany liqala ku- 12,9751 okuyimali elinganiselwa kuR214 219.