Qaphela ungathengi imikokotelo
SASHO sahlangana futhi enkundleni yezezimoto kwelakho eliwela umfula ugcwele. Siyethemba wonke umshayeli owugcinayo umthetho wezomgwaqo useyazi ukuthi siyakuqguqguzela ukuthi uma usamile eceleni komgwaqo lapho kuphephe khona, uqhubeke ushaye ama-hazard ukuze ubonakale nakwabanye abasebenzi bomgwaqo bangagibeli phezu kwakho.
Namhlanje sithe asicaphune enye yezincwadi ezivela kubafundi bale ngosi njengoba nihlala nisibhalela ekhelini lethu elithi hazardiso@gmail.com. Le ncwadi ifundeka kanje:Siyabingelela mfokaShangase. Nginemoto i-Isuzu KB 250 diesel 2012. Ngicela ukwazi ukuthi kulimaza kuphi emotweni uma ngizofaka i-air filter ethengwe kwezinye izitolo ezidayisa izinsimbi zezimoto hhayi kwaGeneral Motors lapho kuyikhaya le-Isuzu? Ngabe ukhona umonakalo ongadaleka esikhathini esizayo? Sibonge ozithobayo - Nhlanhla. Impendulo ithi:Sibingelele Nhlanhla. Sibonge ngokuthi usethembe ngeseluleko osicelayo.
Akulimazi lutho inqobo nje uma iseqophelweni eliphezulu. Uboyibheka ukuthi yakhiwe ubani lena enophawu lweIsuzu. Isibonelo nje uma kuwu GUD, bese uyazithengela lolohlobo lwe GUD olunconywe abakwa-Isuzu uyifake uyothola umphumela ofana ncamashi naloyo obuzowuthola uma ubufake enesigxivizo segama lemoto uqobo.
Okufanele ukugade ukuthenga imikokotelo ngoba yona ayikho eqophelweni eliphezulu, ingasheshe ife noma ifike inesici bese ikulimazela injini yakho ngoba i filter iyisifonyo esivimba uthuli lungangeni phakathi enjinini.
Uma imoto iduma idinga umoya obizwa nge oxygen ewudonsa ngamakhala ayo bese udlula ku air filter ngaphambi kokuthi yama-hazard kuNhlanhla uyongena ku-carburetor noma kumainjector. Uma ungakhipha noma ufake i-air filter engalungile, uthuli lungangena ngaphakathi okungagcina sekukubulela amavalve nama-injector kunyuse izinga lokudlana kwensimbi ngaphakathi enjinini.
Siyethemba uphendulekile. Sibonge Le ncwadi kaNhlanhla seyenze ngakhumbula nokuthi kukhona nenye into eyingozi eyike yenziwe abantu abathanda izimoto ezibhongayo kodwa imali bengenayo. Bahlanekezela i-air filter lapho iphimbo lemoto lishintsha idume sakubhonga kodwa yenyuse izinga lokudla upetrol. Lokho kudalwa ukuthi isuke seyifaka umoya omningi ngaphakathi kanti nezintuli ziyangena sekungathi emva kwesikhathi uhlushwe ama injector.
Kubalulekile ukwazi ukuthi imoto yakho ifaka hlobo luni lwezinsimbi ngoba lezi okuthiwa ezakubo kwayo zijwayele ukumba eqolo ngesizathu sokuthi zinesigxivizo noma zinophawu lwaleyo moto kuphela hhayi ngoba kuwukuthi ziyingqothovu kangcono.
Uboqaphela izimoto eziningi zisebenzisa u-bosch kuma-alternator otholakala ngemali engaduli kakhulu kodwa uma usuthi uwufuna kubo kwayo imoto ubiza itshe lemali.
Hhayi-ke ngivumeleni ngimemezele ukuthi siwavale la awanamhlanje amahazard siqhubeke nokuthanda izimoto zethu njengalokhu sithanda imali.
Uma senza njalo ziyosiphatha kahle siqhubeke nokuthi sishayele ngobuchule obuhambisana nokweluswa yiyo yonke imithetho yezokushayela ebusa leli zwe ukuze sihlangane sisaphephile nangesonto elizayo kuyo le ngosi yezezimoto.
Uma ufisa siyiqhube le ndaba ngena ekhasini lethu Igedlela lami with Sthembiso Shangase ku facebook. Noma-ke wenze njengo Nhlanhla nali ikheli ngezansi Hazardiso@gmail.com