Sebeyilungele iSouth African Cross Country Series
INTAKA ibekelwe amazolo kule mpelasonto njengoba kungumzuliswano wesithathu weSouth African Cross Country Series eToyota Kalahari Botswana 1000.
URichard Leeke III ungomunye wabawubheke ngabomvu lo mjaho.
URichard III (21) uqale ukushayela kwiCross-Country kulo nyaka kanti useke wanqoba esigabeni ashayela kuso nomsizi wakhe uHenry Köhne ngemoto yabo i-ATS Motorsport Ford Ranger. Banqoba eBattlefields 400 ngenyanga eyedlule.
Uthe baziqeqeshe ngokwedlulele kunokujwayelekile futhi iphutha elincane lingenza umonakalo omkhulu.
Nethimba leFord Neil Woolridge Motorsport (NWM) Puma Lubricants into esemqondweni kulo wukunqoba ukuze lizovula igebe esigabeni seClass T.
Umphathi weNWM, uNeil Woolridge, uthe iBotswana Desert Race iwumjaho obalulekile emncintiswaneni njengoba ibanikeza ithuba lokuthi bathole amaphuzu aphindiwe.
“Imiphumela yakulo mjaho ijwayele ukuthi icacise ubani ozothatha isicoco ekupheleni konyaka. Siya kwiDesert Race yalo nyaka sizethemba njengoba iClass T Ford Ranger kuyiyona eseqophelweni eliphezulu kunawo wonke ake akhiwa.”
Iqembu leToyota Gazoo Racing SA nalo lithe liwubheke ngabomvu lo mjaho.
Umphathi weqembu uGlyn Hall uthe iDesert Race ibanikeza ithuba lokuhlola izimoto zabo esigabeni seClass FIA ngokohlelo lwabo lweDakar.
“NeToyota ingabaxhasi balo mjaho ngakho singaphansi kwengcindezi yokuthi senze kahle,” kusho uHall.
Umshayeli weqembu oseke wanqoba kabili kwiDesert Race, uLeeroy Poulter, uthe lo mjaho unzima ngendlela eyisimanga.
Okwamanje uPoulter uyena ozihola phambili ezigabeni zonke ngemuva kwemijaho emibili ngamaphuzu angu60. KwiClass T1 uJohan Horn ohamba ngeMalalane Toyota Hilux ubambane endaweni yesibili noGareth Woolridge weNWM ngamaphuzu angu-33.
Lo mjaho uzoqala ngo-100km wokuhlela ukuthi abashayeli bazoqala kanjani bese kuthi umjaho omkhulu ube kusasa nangeSonto. Usuku ngalinye kuhanjwa u-450km.