UGigaba nekhwelo kosomabhizinisi basemalokishini
UNGQONGQOSHE wezeziMali uMalusi Gigaba usenxuse osomabhizinisi abasebenzela emalokishini ukuba bagxile ekukhuleni emiphakathini yabo ukuqinisekisa ukuthi abantu abahlala kuleyo ndawo bayahlomula oguqukweni kwezomnotho eNingizimu Afrika.
UGigaba obekhuluma embukisweni wezamabhizinisi odonse izinsuku ezintathu eMlazi, eThekwini ngempelasonto edlule, uthe kubalulekile ukukhula komnotho ezweni ukuze lizothuthuka. Kodwa okubaluleke kakhulu wukuqinisekisa impilo engcono ebantwini abahlala emalokishini namathuba angcono kwezamabhizinisi.
“Umnotho waselokishini awukwazi ukufukulwa ama-car wash, izindawo zokugunda, izitolo nezindawo zokucwala izinwele – kumele kube nentuthuko kulezi zindawo ukuze abantu bengeke baye kwezinye izindawo beyofuna izidingo ngqangi,’’ kusho uGigaba enxusa osomabhizinisi ukuthi babekezele esikhathini esinzima kwezomnotho.
Lokhu kuchaza ukuthi abeza nentuthuko nosomabhizinisi kumele bawasebenzise amathuba okwakhiwa kwezinxanxathela zezitolo njengaKwaMnyandu lapho bekunomcimbi wombukiso wezamabhizinisi. Ebhekise kosomabhizinisi abamnyama, uthe intuthuko akumele ibe kwezinye izindawo kodwa umnotho kumele uqale la abantu abahlala khona ukuze umphakathi uzuze.
UGigaba uphinde wancoma uMasipala weTheku ngohlelo lwawo loguquko kwezomnotho ngokushesha njengoba ethe leli dolobha lisemgqeni ngokukhula komnotho nentuthuko njengoba sekwakhiwe inxanxathela yezitolo KwaMnyandu neBridge City KwaMashu.
Kulonyaka iMeya yeTheku uZandile Gumede yethula uhlelo lokuthuthukisa idolobha kulandelwa ikhwelo elihlatshwe wuhulumeni kazwelonke oluthinta izinhlelo ezizoqinisekisa ukuthi abamnyama baba neqhaza elibalulekile emnothweni wezwe.
Izinhlelo zikaMasipala weTheku zinika intsha, abesifazane, abaphila nokukhubazeka, omakadebona nemiphakathi yasemakhaya ithuba lokuthi babe nesandla kwezomnotho.
Lolu hlaka lwezinhlelo luqinisekisa ukufakwa kwezakhamuzi kuzona zonke izinhlelo ezenzeka emawadini njengoba uMeya uGumede ethe zizothuthukisa umnotho nenhlalo emphakathini edla imbuya ngothi.
“Sisheshisa ukungenelela kwethu ukuze kuzuzwe kuphinde kulinganwe ngakwezomnotho. Ukushoda kwamakhono, isibalo esiphezulu sabantu abangasebenzi, ububha nokungalingani kusayizona zinto ezikhathazayo ekutheni umnotho ukhule,’’ kusho uNkk Gumede.
Ukuze kufikwe lapho okuphokophelwe khona kuchaza ukuthi iTheku kumele liqinise ubudlelwano balo nezikhungo eziningi ukuqhakambisa ushintsho nokubheka imikhakha okunethuba lokuthi ikhulise umnotho.
UMasipala weTheku uzoxegisa izithiyo ezivimbela abamabhizinisi amancane ukuthi bancintisane nezinkampani ezinkulu emnothweni.
Ngenxa yamakhono, ukucathuliswa nokudlulisa ulwazi, uMeya uGumede uthe izakhamuzi zingawathola amathuba emkhakheni “okusagiya kuwo idlanzana’’ nanokubhekana nezinselelo ezithinta inhlalo yabantu ngokuthi kwakhiwe amathuba omsebenzi angcono.
“Lolu hlelo lokuguquka kwezomnotho ngokushesha lungasebenza kahle uma ihlelwa ngendlela indaba yokusetshenziswa komhlaba uphinde uthuthukiswe,’’ kusho uNkk Gumede.
UGigaba uthe iNingizimu Afrika isanokhalo olude okusamele iluhambe ekwakheni umnotho othinta izimboni nemikhakha ehlukene engaba wusizo kodwa-ke okubaluleke kakhulu okwamanje wukuthi kube nobudlelwano phakathi kwamazwe asathuthuka nasethuthukile. Uthe uhulumeni wenza yonke imizamo ukulwa nobubha.