OweSuperSport ubonga iNedbank Ke Yona
UMDLALI ovunjululwe kuNedbank Ke Yona Team ngo-2015, u-Aubrey “Postman” Modiba, unethemba lokuthi ukunqoba kwakhe iNedbank Cup ngoMgqibelo neSuperSport United kuzovukuza okuthile kubadlali abekade bedonsa izinyawo ngaleli thuba elivezwa yileli bhange.
Lokhu uModiba (21) ukusho izolo kwiPower FM lapho ebegeqa khona amagula ngoshintsho olusempilweni yakhe ngenxa yokuthembela ethalenteni lakhe nokusukumela phezulu uma kuvela amathuba anjengeNedbank Ke Yona.
Kusukela lo mdlali waseLimpopo eqokwe yiMpumalanga Black Aces kulandela ukudlala kahle kuKe Yona Team eminyakeni emibili edlule usewadlalele wonke amaqembu esizwe. Uqokwe evele esedlalile ku-U/17. Kusukela evelele ngeKe Yona Team usebonakale ku-U/20, U/23 obukuma-Olympic ngo-2016, eBrazil lapho ebemakene khona noNeymar weFC Barcelona kanti useze washaya ngisho igoli kuBafana Bafana.
“Ngizizwa ngihlonipheke kakhulu ngokuthi ngivunjululwe kuNedbank Cup Ke Yona Team kudlule iminyaka embalwa ngisidle lesi sicoco. Kuhle enhliziyweni yami ngoba lesi isicoco sami sokuqala ebholeni elikhokhelayo. Abaningi bangazitshela ukuthi kulula IKHASI ELIKHOKHELWE kodwa mina ngithi ukuzikhandla nokulalela. Ngibe nenhlanhla ngadlula ezandleni zabaqeqeshi abahlonishwa umhlaba wonke. Ngiqale ngasebenza no-Owen (Da Gama), Ephraim (Mashaba), Khabo (Zondo) ngaphambi kokuthi ngisebenze noMuhsin (Ertugral) ngakho-ke ngingasho ukuthi ngibe nenhlanhla. Yize kunjalo ngisho ngilele ngihlale ngikukhumbula njalo ukuthi lokhu bekungeke kwenzeke ngaphandle kokuzinikela kweNedbank ekuthuthukiseni abadlali abangaziwa,” kusho uModiba.
Mayelana nabadlali abanesifiso sokuqhubeka nebhola kumbe abathanda ukulenza umsebenzi, uModiba uthe bangazibukeli phansi kumbe bazingabaze.
“Kusemqoka kimina lokhu nakwabaningi ngoba nginethemba lokuthi kuzovukuza okuthile kubadlali abancane abanesifiso sokuqhubeka nebhola. Angikaze ngikholwe ukuthi ngiyoke ngidlale esigabeni esikhulu ngize ngishaye ngisho igoli. KukuMdali konke kodwa kubalulekile ukuthi simsize ngokuzikhandla nakakhulu ukuze abaqeqeshi bagqanyelwe uwena kubantu abaningi.”
UModiba ujabule nje kodwa umsebenzi uyaqhubeka kuyena nozakwabo njengoba ngempelasonto benomunye umdlalo omqoka.
NgoMgqibelo I-United izobhekana ne neHoroya AC yaseGuinea koweCAF Confederation Cup eConakry, eStade de 28 Septemba, ngo-5 ntambama.
Idinga ukuqhubeka nokuqoqa amaphuzu ukuze izibeke ethubeni lokudlulela kuma-quarterfinal.