Zizowushaya maduze kumsakazi woKhozi
KUVELA ukuthi uzoba sekupheleni kwalo nyaka umshado womsakazi woKhozi FM, uSthandwa Nzuza, ozombeswa abasemzini wakhe ngoMgqibelo kubo eRedhill, eThekwini.
Isolezwe lithole ngemithombo yalo eyehlukene ukuthi uSthandwa uzobe embeswa yisinqandamathe sakhe esingusomabhizinisi waseMgungundlovu, uMfundisi Philani Gama.
UMfu Gama unebhizinisi labangcwabi, iGama Classic Funerals.
Bathuse abaningi ngesikhathi kubonakala izithombe zabo ezinkundleni zokuxhumana uMfu Gama ethembisa uSthandwa umshado ebandleni abakhonza kulona.
“Konke sekumi ngomumo ngomcimbi wangoMgqibelo nabantu abayizimenywa ezikhethekile sebetsheliwe ngezinhlelo zomembeso. Nasemsebenzini (oKhozini) uSthandwa usezikhiphile izimemo zomcimbi wakhe emema abalingani bakhe,” kuchaza umthombo.
Omunye umthombo uthe yize lungakaphumi usuku lomshado kodwa bekusabikwe ukuthi ungase ube ngoOkthoba noma ngoNovemba.
“Kodwa ngeke uphele unyaka uSthandwa engashadile njengoba konke nibona sengathi kuyashesha. Ufuna ukushadela olwandle ezihlabathini, izinhlelo zisho njalo,” kuchaza umthombo.
Uthe noSthandwa ujabule kakhulu ngalolu suku njengoba ematasa enza amalungiselelo.
Imizamo yokuthola uSthandwa ukuze aphawule ngalezi zindaba ayiphumelelanga njengoba ucingo lwakhe belukhala lungabanjwa.
Kulezi zinsuku le ntokazi ibonakala imatasa ifaka izithombe zayo ku-Instagram kubukeka sengathi isiqale phansi iqopha iziqephu zoZalo.
Ucingo lwasehhovisi lwaseThekwini nolwaseMgungundlovu lwezindawo zokungcwaba zikaMfu Gama belukhala lungabanjwa.
Khonamanjalo isilomo somethuli wezinhlelo, uMinnie Dlamini, naso sizobe sembeswa kubo eDurban North ngesonto elizayo.
UMinnie uzobe embeswa yisinqandamathe sakhe uQuinton Jones owamthembisa umshado ngonyaka odlule. RUSSIAN BEAR FLAVOURS 750ML SKY VODKA