Ovele kwiDMF uchitha imibono
AKASONA isigebengu, iphara, umhuqa wensangu ohlala edakwe utshwala uThulani Maphumulo (30). Lo mlisa ushiye iningi lingawuvali umlomo ezinkundleni zokuxhumana ngesikhathi evela ohlelweni, iDate My Family, ngeSonto.
Le nsizwa edabuka ePort Shepstone kodwa ehlala ePinetown, ibivele kulolu hlelo oluqoshwe eThekwini izama inhlanhla yokuthola intombi.
Ngemuva kokubonakala kulo abantu bakuleli basole abakhiqizi bohlelo ngokudlala ngabo.
Iningi belithi uThulani ubukeka njemuntu othathwe emgwaqweni, kwathiwa akazozama inhlanhla kulolu hlelo.
Engxoxweni neSolezwe uThulani ukubeke kwacaca ukuthi akahlali emgwaqweni njengoba abantu besho.
“Sengisaba nokuphuma ekhaya ngenxa yokuthi ngoMsombuluko ngihlangane nenkinga edolobheni ePinetown, abantu bethuka uma bengibona abanye bengidonsa ngapha nangapha. Ukuvela kuthelevishini ngingasho ukuthi kube kuhle kwaba kubi futhi. Ngiphatheke kabuhlungu ngibona abantu bekhuluma izinto okungezona ngami ezinkundleni zokuxhumana ngoba bebona indlela engibukeka ngayo kodwa ngingasho ukuthi angiyona neyodwa into akade beyisho ngami,” kusho uThulani.
Uthe abantu basuke babuka indlela abukeka ngayo bazidwebela isithombe esingekho.
“Yebo, angisebenzi kodwa ngiyazisebenza njengoba ngidayisa izimpahla ukuze ngisize umama ngemali yokudla. Angiwubhemi ugwayi, utshwala ngiyabuphuza njengawo wonke umuntu kodwa izidakamizwa angikaze ngizithinte. Nginenkolelo yokuthi kumele umuntu ngamunye asebenze kanzima ukuze aphumelele empilweni,” kuchaza yena.
Empilweni yakhe uThulani uthe, uzisola kakhulu ngokudweba ama-tattoo asemzimbeni ngoba akaqasheki ndawo.
Uthe kwakungeyona injongo yakhe ukungena kulolu hlelo kodwa umngani wakhe washaya ungqimphothwe ngomzuzu wokugcina, abaqopha uhlelo sebefikile. “Ngesikhathi sebesho ukuthi bayeza umngani wami wafikelwa ukwesaba wangicela ukuthi ngingene kube yimi engifuna intombi. Ngenxa yokuthi bengingenayo ngathatha ithuba. Kodwa nawe wabona ukuthi labo sisi abangithandanga futhi ngakwemukela lokho ngoba nabo babebona umuntu ‘oyisigebengu’.” Uthe namanje akakamtholi umaqondana usamfuna. Esikoleni uthe wagcina kwaGrade 11, ngenxa yokuthi kukhona izinto eza-mphazamisa ezidinga umndeni kayise.
Laba besifazane abavela ohlelweni naye, uThulani ubafanise namaqola njengoba ethe babefuna izinto eziwubukhazikhazi ezinjengemali nemoto bengafuni uthando.