Ubelethe amawele amathathu emgwaqweni
UTHOLE abengakulindele owesifazane obelethe amawele amathathu ekade elindele amabili esizwa ngabezimo eziphuthumayo emgwaqweni ePort Shepstone.
UNksz Sthandiwe Madlokovu (26) waseMkholombe, ePort Shepstone, uthukile ngesikhathi ethola ukuthi abantwana bakhe ababelethe ngoMgqibelo odlule bangamawele amathathu ngoba yena ubelindele amabili.
“Sonke lesi sikhathi bengizitshela ukuthi ngizothola amawele amabili. Ngize ngathola ngoba umsebenzi wezimo eziphuthumayo ethi kukhona enye ingane. Ngimphikisile ngathi kuyena izingane zimbili kuphela. Bengisesezinhlungwini kodwa ngingazitsheli ukuthi yingoba ngingakaqedi ukubeletha. Kube sekuphuma iwele lesithathu,” kuchaza uNksz Madlokovu. Amawele akhe amathathu – u-Owami, Okuhle no-Olona angamantombazane – azalwe ngesikhathi sasekuseni ngoMgqibelo ngesikhathi esalinde i-ambulensi ngoba ingakwazi ukungena lapho ehlala khona.
Uthe abezimo eziphuthumayo bafike ingane yokuqala eseyibelethile esizwa ngomunye womakhelwane bakhe.
“Ngibonga ukuthi bafike ngesikhathi ngoba bekubanda kakhulu ngisaba ukuthi izingane zingangenwa amakhaza. Ngenxa yalokho izingane ziphephile zisesimeni esihle.”
UNksz Madlokovu, obebamba amatoho, uthe ume emsebenzini ngenxa yokukhulelwa, usazohlala ekhaya anakekele abantwana bakhe.
Uthe akaziboni ethola ezinye izingane maduzane njengoba enenye yentombazane elanywa yilamawele.
Abasebenzi bezimo eziphuthumayo, uMnuz Siboniso Khuzwayo noMnuz Stanely Zulu bathole ucingo emuva kwehora lokuqala ekuseni baphuthuma bafika khona emuva kwemizuzu eyishumi.
“Ucingo esilutholile beluthi siyothatha umuntu ozobeletha ngendlela ejwayelekile. Ubese eyibelethile ingane yakhe yokuqala ngesikhathi sifika. Sifike sekuzophuma ingane yesibili sasheshe saqala samsiza. Ingane yesibili iphumile kodwa kwathi uma uzakwethu, uKhuzwayo, emthinta esiswini wezwa ukuthi kunengane yesithathu. Unina umangele ngoba ebelindele ezimbili,” kusho uZulu.