Useshiye umsebenzi onenkinga yokukhula ngokweqile kwamabele
UTHWELE kanzima owesifazane waseNtshangwe (48) oseyeke ukusebenza ngoba ehlushwa ukukhula ngokweqile kwamabele akhe.
UNksz Nomusa Dladla uthe inkinga yokukhula ngokweqile kwamabele akhe seyimenze wagcina engasakwazi ukuma isikhathi eside nokulala kahle ngenxa yezinhlungu.
Ubengumsebenzi wasezindlini aphinde adayise izimpahla zokugqoka kodwa ngenxa yesimo sakhe useyekile. Isimo sakhe sesikwenze kwanzima nokuphumela ngaphandle ngoba abantu bakhombisana ngaye bahleke noma babe nezinkulumo abazikhulumayo. Noma eya ezitolo zezingubo akawutholi ubhodisi omlinganayo. Uvele akhale, ahluleke nokuzibamba uma echaza isimo sakhe.
Sekuneminyaka emine elinde ukuncishiselwa amabele emuva kokuthi isibhedlela sokuqala aya kusona sathi kufanele ancishiswe ukuze abuyele esimeni esijwayelekile. NgoJanuwari 2013 uhambele isibhedlela saseMgungundlovu, i-Edendale ngoba ebona inkinga yokukhula kwamabele akhe nobuhlungu bawo iqhubeka. Uthe kulesi sibhedlela bayibona inkinga yakhe ngo-Ephreli walowo nyaka bamdlulisela eGrey’s, eMgungundlovu ngoba bethi yiso esingamsiza. Uthe udokotela wakulesi sibhelela wayibona inkinga wathi kuzofanele ancishiswe. Bamqalise uhlelo lokuncipha ngoba bethi ukhuluphele kakhulu nokungaphazamisa uma ehlinzwa. Uthe bamdlulisele eNkosi Albert Luthuli Central nokuyilapho okwakulindeleke ukuthi ahlinzwe khona amabele. Uqale ukuya kulesiya sibhelela ngoJanuwari 2015 kodwa kuze kube manje akukacaci ukuthi usazoncishishwa yini nokuthi kuzokwenziwa nini.
NgoNovemba 15 nyakenye bekuhlelwe ukuthi uzohlinzwa eselungiseleliwe kwathiwa akangadli usuku lonke. Kuthe uma kufika isikhathi sokuyohlinzwa kwathiwa abekho abasebenzi ababhekele ukulalisa iziguli uma zizohlinzwa, wabuyiselwa ekhaya kwathiwa abuye ngoAgasti kulo nyaka.
“Okungiphatha kabi ukuthi nginezingane engizikhulisayo nezingidingayo. Bengizisebenzela ngikwazi ukuzenzela konke ezikudingayo kodwa manje angisakwazi. Ngifisa ukusizwa ngikwazi ukuphinde ngikwazi ukusebenza.”