Isinqumo ngezenkolo ezikoleni
UMNYANGO wezeMfundo eyisiSekelo uthi uyasamukela isinqumo esikhishwe yinkantolo enkulu yaseGoli izolo sokuthi izikole zakuleli kuzomele ziyeke ukuqhakambisa inkolo eyodwa kunezinye ezikhona kuleli.
Izolo ijaji uMnuz Willem van der Linde, ukhiphe lo myalelo ngesikhathi enquma ngesicelo esasifakwe yi-Organisation for Religious Education and Democracy (Ogod).
“Sekunqunyiwe ukuthi kuwukubukela phansi amalungelo abantu kuleli ukuthi isikole sikahulumeni noma othisha abakuso bagqugquzele inkolo eyodwa, kushaywe ngesithende ezinye,” kusho uVan der Linde.
Okhulumela umnyango, uMnuz Elijah Mhlanga, uthe bayasemukela lesi sinqumo kwazise sihambisana nomgomo ongaphansi kweSouth African Schools Act, ngokunjalo noMthethosisekelo wakuleli.
“Inhloso akukhona ukuthi kuchithwe ezenkolo ezikoleni kodwa ukuvikela abafundi nokugcizelela ukuthi kumele kugxilwe ekufundiseni ngezenkolo hhayi ukuqhakanjiswa kwenkolo eyodwa esikoleni noma ukuyalela abafundi ngayo,” kusho uMhlanga.
Uthe akukho okuzoguquka ezikoleni ngoba inkantolo igcizelele umthetho obusubekiwe vele odabeni lwezenkolo ezikoleni.
“Sisazosicubungula kahle nokho isinqumo senkantolo. Sicela nokukhumbuza abezigungu ezengamele izikole ukuthi nabo baqinisekise ukuthi imithetho yesikole iyahambisana nalokhu,” kuqhuba uMhlanga.
UMnuz Paul Colditz, wenhlangano yezigungu ezilawula izikole iFederation of Governing Bodies of South African Schools, uthe bazosicubungula lesi sinqumo senkantolo.
Uthe kakade akumele izikole ziqhakambise inkolo eyodwa ekubeni abafundi bekholelwa ezintweni ezingafani.
“Lesi sinqumo sigcizelela ukuthi akukho nkolo okumele iqhakanjiswe kunezinye. Izikole kuzomele ziwulandele lo myalelo,” kusho uColditz.
UMnuz Johan Kruger, weSolidarity ebimele izikole eziyisithupha ebezimangalelwe, uthe yizigungu zabazali okumele zinqume ukuthi yiziphi izinkolo okumele zizilandele.
Kuphume lo myalelo nje ngenyanga edlule i-Ogod ifake isicelo enkantolo sokuthi inqume odabeni lokubusa kwenkolo eyodwa ezikoleni zikahulumeni kuleli.
I-Ogod ibikhalaza ngokuthi ukuqhakanjiswa kwenkolo eyodwa ezikoleni zikahulumeni kucindezela ilungelo lokulingana, elenkolo, ngokunjalo nelenkululeko yokuzikhethela inkolo.
I-Ogod ibifake lesi sicelo ikhalaza ngezikole eziyisithupha okuyiLaerskool Randhart, Laerskool Baanbreker, Laerskool Garsfontein, Hoërskool Linden, Hoërskool Oudtshoorn ne-Oudtshoorn Gimnasium.
UMhlanga unxuse abazali ukuthi bathamele imihlangano yezigungu ezikoleni ukuze babe nezwi ezintweni ezithinta imfundo yezingane zabo.